Dan qalu l-Prim Ministru Joseph Muscat waqt li ndirizza l-Konferenza Ġenerali tal-Partit Laburista.
Qal li l-Maltin u l-Għawdxin jafu li pajjiżna miexi fid-direzzjoni t-tajba. Aktar familji saru middle class u dan għaliex żammejna kelmtna, fejn daħħalna bosta mizuri fejn żiedna aktar flus fl-idejn.
Dan kollu, qal il-Prim Ministru, għamilnih għaliex għandna roadmap li mhux insejniha, iżda segwejniha, u li tat ir-rizultati. Qed inġibu xogħol u investiment bla preċedent minn madwar id-dinja u minn pajjiżna stess. Investiment li mhux biss se jassigura xogħol għalina, iżda anke għal uliedna. Xogħol li jfittex lil ħaddiema. Xogħol li jrid ikun b’ kundizzjonijiet aħjar u li jwassal għal karrieri fejn wieħed javvanza f’ħajtu. Ħaddieħor qal li xeba jisma’ dwar is-suċċess ekonomiku ta’ pajjiżna. Jiddispjaċini għalih, iżda se jkollu jidra għax ġejjin aktar suċċessi. Filfatt, dalwaqt se nħabbru investiment kbir ieħor li se jżid ħafna postijiet tax-xogħol ġodda f’ pajjiżna. Postijiet li aħna u uliedna rridu nkunu mħarrġa għaliihom, ħabbar Dr Muscat.
Il-Mexxej Laburista fakkar kif dan il-Gvern daħħal mizuri soċjali kbar filwaqt li poġġa l-finanzi tal-pajjiż fuq l-aktar sisien sodi li qatt kienu biex għall-ewwel darba f’ġenerazzjoni rnexxilna ningħaqdu ma’ grupp żgħir ta’ pajjiżi fil-quċċata li daħħlu aktar milli nefqu. Dan huwa surplus li għandna biex inkunu kburin bih tenna Joseph Muscat filwaqt li fakkar kif il-pajjiż ma żidx id-dejn iżda minflok ħassar id-dejn kollu li sar fil-leġislatura ta’ qabel.
Qed jirnexxilna negħlbu l-isfida tal-faqar
“B’differenza minn ħaddiehor, għalina l-faqar mhux perċezzjoni iżda realtà, u għalhekk bdiet ħidma mill-ewwel, bl-ewwel għan ikun li nneħħu l-faqar lit-tfal f’familji fejn hemm mill-inqas persuna waħda taħdem. Qed jirnexxilna nagħmlu dan, filfatt din il-ġimgħa ħarġu l-figuri dwar severe material deprivation, jiġifieri faqar assolut, f’pajjiżna” spjega Dr Muscat.
Fejn fl-2013 il-Gvern wiret 39,000 persuna fil-faqar assolut, li fi tliet snin, dan il-Gvern irnexxilu jnaqqas għal 19,000 persuna.
Il-Mexxej tal-Partit Laburista qal li dan il-Gvern naqqas il-faqar bin-nofs, dan il-Gvern ħassar il-faqar kollu li żdied matul il-leġislatura ta’ qabel u għamel dan billi naqqas il-kontijiet, inċentiva x-xogħol u ta l-benefiċċji lil min għandu bżonn.
“Dan huwa Gvern ekonomikament kompetenti u soċjalment responsabbli” sostna Dr Muscat…”kieku Dom Mintoff kien ikun kburi bil-mod kif qed jitmexxa l-pajjiż illum”.
Il-Prim Ministru qal li kellna l-akbar tnaqqis fil-faqar fl-Ewropa kollha, u issa il-livell ta’ faqar tagħna huwa l-istess daqs tal-Ġermanja minkejja li għadd irid ikun ikkalkulat l-impatt tal-baġit li għadda.
Minkejja dan, xorta waħda, 19,000 huma ħafna u għalhekk jien inwiegħed li l-ġlieda kontra l-faqar se tibqa’ prijorità u kif naqqasna l-faqar bin-nofs se naħdmu biex inħassruh darba għal dejjem minn pajjiżna.
“Se tkun diffiċli iżda se jirnexxielna. Il-filosofija tagħna se tibqa’ tkun dik liċ-ċavetta tal-mobiltà soċjali huma l-edukazzjoni u x-xogħol saħaq il-Mexxej tal-Partit Laburista filwaqt li tenna kif il-mira ewlenija hija li fis-snin li ġejjin l-ebda tifel jew tifla li jgħixu f’familja fejn hemm imqar persuna waħda li taħdem ma tgħix fil-faqar”.
30,000 ħaddiem, 30,000 familja b’żieda fil-paga tagħhom
Dr Muscat għamel referenza għall-iffirmar tal-ftehim kollettiv tas-Servizz Pubblika, wara qbil ma’ seba’ unjins. Permezz tiegħu, 30,000 ħaddiem, 30,000 familja se jgawdu minn żieda fil-paga. Minn dan is-servizz se jkunu influwenzati l-postijiet tax-xogħol kollha filwaqt li l-aktar li għandhom iħossu d-differenza huma ż-żgħar u tan-nofs, fejn bdejna nirranġaw ir-relattività biex min jinsab fil-middle class jieħu dak li ħaqqu.
“Filwaqt li sar dan kollu u ddaħħlet aktar effiċjenza, ma jfissirx li l-isfidi spiċċaw” qal il-Prim Ministru.
Wara li għolew il-pagi u tjiebu l-kundizzjonijiet u ingħalqu ħafna abbużi tal-prekarjat tal-ħaddiema tal-kuntratturi mal-Gvern, Joseph Muscat qal li issa wasal iż-żmien li wieħed jaħseb fil-ħaddiema li jagħtu servizz lill-privat, billi jkun żgurat il-principju tal-equal work for equal pay.
Dr Muscat semma li kif dan huwa u l-Gvern se jibqgħu jkunu pro-business fejn min jinvesti u l-ħaddiema jieħdu dak li ħaqqhom. L-għan tagħna huwa li aktar żgħażagħ jaraw f’pajjiżna l-post fejn jistgħu javvanżaw huma u jimxu ‘l quddiem uliedhom. Sigurtà finanzjarja għall-ġejjieni ta’ uliedna. Izda filwaqt li naghmlu hekk m’għandniex ninsew lil min ikkontribwixxa fil-passat biex wasalna s’hawn. L-anzjani tagħna, li ħafna minnhom żidnilhom il-pensjoni, li minn din is-sena mhux se jħallsu taxxa fuq l-ewwel €13,000 pensjoni, li qed inħallsulhom nofs l-ispejjeż jekk iġibu lil xi ħadd jieħu ħsiebhom, li żidna minn din is-sena l-pensjoni tal-wens lil min jieħu ħsiebhom, li huma fost l-aktar li gawdew mir-roħs tal-kontijiet, li issa qed isibu l-mediċini li għandhom bżonn u bdejna nwassluhomlhom id-dar. Lil dawn l-anzjani tajnihom ħafna iżda xorta mhux bizzejjed. Lil anzjani tagħna ngħidulhom li se nkomplu ntejjbulkom il-kwalità tal-ħajja taghkom, qal Joseph Muscat.
