Ftit ġimgħat ilu onenews.com.mt tkellem ma’ Kyle Duca, żgħażugħ ta’ 24 sena magħruf ma’ bosta għat-tpinġijiet li jagħmel li fil-maġġoranza tagħhom jkunu ta’ plejers tal-futbol.
Illum Kyle kiteb fuq is-sit soċjali ta’ Facebook li għadu kif irċieva aħbar ferm sabiħa hekk kif għadu kemm jikkuntattjah il-plejer Paulo Dybala fejn qallu li hu kien ir-rebbieħ tal-kompetizzjoni li ħa sehem fiha.
Dan wara li Paolo Dybala nieda kompetizzjoni fuq il-paġna uffiċjali tiegħu għal dawk kollha li għandhom l-arti għal qalbhom. Dybala talab lill-fanatiċi tiegħu biex joħolqu tpinġija tiegħu u jpoġġuha fil-kummenti ta’ wieħed mill-posts tiegħu .
Ir-rebbieħ ta’ din il-kompetizzjoni kellu jkun l-artist li kellu l-aktar ‘likes’ fuq ir-ritratt fejn Kyle kellu madwar 1,163 ‘like’.
Kyle fil-kumment tiegħu fuq Facebook kiteb li r-rigal li hu kien se jaqla’ minn din il-kompetizzjoni, flokk iffirmat mill-plejer innifsu, se jkun qed jagħtih lill-karità.
