Il-plejer Portugiż, Cristiano Ronaldo rnexxielu jikser rekord ieħor, hekk kif huwa sar l-iżjed plejer li skurja waqt il-Kampjonati Ewropej.
Dan hekk kif il-captain tal-Portugall skorja darbtejn fl-aħħar għaxar minuti tal-partita kontra t-tim Ungeriż u b’hekk skorja l-għaxar u l-ħdax-il gowl tiegħu fl-istorja tal-Kampjonati Ewropej.
Cristiano Ronaldo rnexxielu jagħmel dan ir-rekord, wara li qabeż lill-Franċiż, Michel Platini li b’kollox kien skorja disa’ gowls fl-istorja tal-Kampjonati Ewropej.
Għal Cristiano Ronaldo, dan huwa l-ħames kampjonat Ewropew li qed jilgħab fih.
Fl-aħħar edizzjoni, dik tal-EURO 2016 li saret fi Franza, huwa rnexxielu jgħolli t-trofew, hekk kif il-Portugall rebħu din il-kompetizzjoni għall-ewwel darba fl-istorja tagħhom.
