Cristiano Ronaldo se ikun qed jirritorna jilgħab ġewwa Old Trafford wara tlett staġuni mal-ġganti Taljani Juventus.
Oriġinarjament, l-istilla Portugiż kien se jingħaqad mar-rebbieħa tal-Kampjonat Ingliż Machester City, hekk kif il-klabb Ingliż kien lest itiħ kuntratt ta’ ħmistax-il miljun ewro għal żewġ staġuni, filwaqt li offrew lil Juventus ftit iktar minnn tmienja u għoxrin miljun ewro għaliex Ronaldo kien fadallu sena kuntratt.
Iżda t-trasferiment ta’ Ronaldo, li rebaħ aktar minn tletin trofew ewlieni tul il-karriera tiegħu, ħa żvolta drammatika fl-aħħar sigħat hekk kif fl-aħħar ħin, Manchester United ħabbru uffiċjalment fuq Twitter li waslu fi ftehim ma’ Juventus biex Ronaldo jiġi ttrasferit magħhom.
Ronaldo mistenni jiffirma kuntratt ta’ sentejn suġġett li jingħata viża, b’Manchester United se jħallsu għoxrin miljun ewro lill-klabb Taljan flimkien ma’ tliet miljun bonuses.
Ma’ Manchester United, Cristiano Ronaldo, f’sitt snin, rebaħ tliet titli tal-Premier League, ċ-Champions League, żewġ League Cups u FA Cup. Dan filwaqt li rebaħ ukoll il-FIFA Club World Cup u Community Shield kollha taħt Sir Alex Ferguson.
Fl-ewwel avventura tiegħu ma Manchester United, Ronaldo skorja 118-il gowl f’292 logħba. Intant, permezz ta’ filmat qasir fuq Instagram, Cristiano Ronaldo irringrazzja li supporters Juventini għal rispett li dejjem urewħ u spjega li tlett staġuni li għamel mal-klabb Taljan kiseb affarjiet kbar.
