Se jimxi tmienja u erbgħin kilometru u jżur tmienja u erbgħin destinazzjoni kulturali għal għeluq it-tmienja u erbgħin sena minn twelidu.
Din hi l-inizjattiva msemmija ‘L-Istorja Tkompli’, li se jkun qed jimbarka fuqha l-esploratur lokali Conrad Neil Gatt.
“Jiena se jkolli l-birthday fid-29 ta’ Jannar u xtaqt li flok nirċievi xi ħaġa jiena, aktar nagħti xi ħaġa lill-pubbliku u, aktar u aktar, lill-wirt kulturali ta’ pajjiżna.”
Conrad Neil Gatt, Esploratur
Gatt li, permezz tal-midja soċjali, iqajjem ħafna għarfien dwar il-wirt kulturali li għandna madwar pajjiżna, tkellem magħna favur il-preservazzjoni ta’ dak li għandna, biex nissalvagwardjawh għall-futur.
Din l-attività se tibda għall-ħabta tal-għaxra ta’ filgħodu u mistennija li tibqa’ għaddejja għal madwar għaxar sigħat.
“Ħa jkunu għaxar sigħat ta’ mixja li ħa nitlaq minn Birkirkara u nżur tmienja u erbgħin post ta’ wirt kutlurali li diġà esplorajna aħna u t-tim tiegħi. L-idea hi li matul il-mixja kull meta ngħaddu minn post ta’ wirt kulturali li huma mmarkati fuq il-mappa tagħna se nkunu qed nagħtu informazzjoni dwar is-sit partikolari kif ukoll nehmżu links ta’ TikTok jew YouTube meta aħna diġà wrejna dan il-post minn ġewwa.”
Conrad Neil Gatt, Esploratur
Ma’ dan l-istazzjon, Gatt qasam ukoll idea oħra li mistennija toħroġ minn din il-mixja.
“Għadni ma tantx qed nisħaq fuqha, però ħa nipprova nagħmel l-ewwel rekord ta’ mixi f’ħin qasir u li se nkunu qed inżuru l-wirt kulturali Malti. S’issa għad mhemmx dan ir-rekord u ħa nipprovaw naħdmu għalih.”
Conrad Neil Gatt, Esploratur
Minkejja t-tul tal-mixja, Gatt qed jistieden lill-iskejjel biex jingħaqdu f’din l-inizjattiva u b’hekk jitqajjem aktar għarfien.
“Qed nipprova nistieden lill-iskejjel, diġà bgħatt emails lill-Prinċipali biex min irid jingħaqad jagħmlu outing lit-tfal f’wieħed minn dawn il-postijiet kulturali li aħna żorna, li huma safe u jistgħu jmorru t-tfal u meta nkun għaddej, stop-and-go mhux ħa noqgħod nieqaf minħabba l-ħin u nieħdu group photo.”
Conrad Neil Gatt, Esploratur
Din il-mixja se tkun tixxandar fuq il-paġna ta’ Gatt, CNG Trekventures, biex b’hekk il-pubbliku jkun jista’ jsegwi u jħossu parteċipi fl-inizjattiva, filwaqt li min irid jista’ juża l-hashtag listorjatkompli.
