Wara li ftit ġimgħat ilu l-Kummissjoni Ewropea tat il-barka lill-proġett tal-impjant tal-gass billi qalet li dan hu għalkollox konformi mar-regoli Ewropej, fl-aħħar jiem ippubblikat rapport ta’ 28 paġna li fih rendikont tal-analiżi li għamlet biex waslet għall-konklużjonijiet tagħha.
Tispikka f’ħafna drabi l-kelma compliant fejn il-passi kollha li ħa l-Gvern b’rabta ma’ dan il-proġett huma meqjusa bħala konformi mal-liġijiet u direttivi tal-Unjoni Ewropea, kif ukoll ġustifikabbli fiċ-ċirkostanzi ta’ Malta. Għax Malta hi gżira żgħira maqtugħa mill-bqija tal-kontinent u trid tassigura li għandha biżżejjed elettriku bil-għan li l-pajjiż jibqa’ għaddej.
Fir-rapport kienet spjegata d-deċiżjoni li l-Kap tal-Oppożizzjoni sejħilha korrotta u li dwarha lmenta ma’ Jean Claude Juncker, President tal-Kummissjoni Ewropea.
Dan għaliex Busuttil qed ikompli jopponi l-proġett tal-impjant tal-gass li jwassal għal prezzijiet tal-elettriku orħos u biex pajjiżna jkollu sigurtà tal-provvista. Fuq kollox Busuttil kien ilu snin jipprova jorbot il-proġett ma’ korruzzjoni u wara li l-esperti Ewropej analizzaw il-kuntratti u d-dokumenti, karta wara karta, irriżulta li mhux talli ma kien hemm ebda korruzzjoni iżda kollox sar skont ir-regoli Ewropej u bi trasparenza.
Wara li analizzat ir-rapporti tekniċi tal-Gvern Malti, il-Kummissjoni Ewropea fiehmet u qablet li l-impjanti antiki ta’ pajjiżna (Dellimara One u l-Marsa) li jniġġsu jridu jingħalqu u għalhekk joħolqu l-ħtieġa tal-impjant il-ġdid.
Saħansitra, tikkonferma l-Kummissjoni Ewropea, it-terminal tal-gass f’Dellimara kien l-aħjar għażla biex Malta tassigura li jkollha provvista tal-elettriku f’ekonomija li qed tikber. Fuq kollox il-Kummissjoni Ewropea stess tirrikonoxxi kif Malta ma tistax tkun dipendenti fuq l-interconnector ma’ Sqallija biss, kif trid l-Oppożizzjoni ta’ Simon Busuttil.
“Ladarba Malta trid tirrispetta l-kriterja N-1, il-kapaċità adegwata trid tkun assigurata mhux biss biex tlaħħaq mad-domanda iżda anke biex tagħmel tajjeb għan-nuqqas tal-interconnector jekk ma jkunx disponibbli,” jgħidu l-esperti tal-Kummissjoni Ewropea.
Għalhekk, tikkonkludi il-Kummissjoni Ewropea f’punt 115 tar-rapport, il-proġett se jagħti dan serħan il-moħħ biex Malta tkun konformi mal-kriterji li hija obbligata li tilħaq. Anke għaliex b’interconnector għaddej taħt il-baħar jekk jinqalgħu ħsarat u diffikultajiet ma jissolvewx mil-lum għal għada.
Kritika oħra li saret f’Malta mill-Oppożizzjoni u li tweġibha l-Kummissjoni Ewropea hija dwar it-tul tal-kuntratt. “Ladarba t-18-il sena huma iqsar mill-ħajja tal-impjant, il-Kummissjoni Ewropea tikkonkludi li dan il-perjodu huwa ġustifikabbli,” jingħad fir-rapport li jinnota wkoll kif l-awtoritajiet Maltin kienu konformi wkoll mar-regoli tax-xiri pubbliku fost oħrajn. Fl-istess ħin kien irrimarkat ukoll li Malta se tixtri l-enerġija bl-irħas prezzijiet u kif jaqblilha.
Ir-rapport, li terfa’ r-responsabbiltà tiegħu billi tiffirmah, il-Kummissarju Ewropea għas-Suq Intern, Margrethe Vestager issegwi kummenti tagħha stess li qalet li b’din l-analiżi d-deċiżjoni tal-impjant tal-gass hija magħluqa darba għal dejjem.
Intant, ir-rapport inzerta li kien ippubblikat fl-istess jum li f’Dellimara kien hemm il-wasla tat-tieni tanker tal-gass li qed ikompli jimla bil-gass l-LNG Armada Mediterenaea biex la jitlestew it-testijiet, pajjiżna jibda jiġġenera parti sostanzjali mill-enerġija tiegħu b’dan is-sors ta’ enerġija nadifa.
Il-Ministru Konrad Mizzi laqa’ r-rapport tal-Kummissjoni Ewropea li tapprova l-istate aid u qal li dan ifisser li huwa konformi minn kull aspett mar-regolamenti. Huwa qal li din l-approvazzjoni tfisser li hemm ċertezza legali dwar il-proġett u l-kuntratti li ngħataw dwaru.
Il-Ministru Mizzi qal dan ixejjen għalkollox il-kritika li kienet għamlet l-Oppożizzjoni dwar il-kuntratti li saru mal-konsorzju Electrogas.
