Therese Comodini Cachia hija l-ewwel deputata Nazzjonalista li ħarġet fil-beraħ kontra Adrian Delia, għalkemm ONE News huwa infurmat li hemm ferm iżjed, fosthom id-Deputati tal-Blue Heroes, li qed jużaw l-aħħar ġlied fil-Partit Nazzjonalista biex ikomplu jippressaw lill-Kap Bernard Grech ħalli jiġi eliminat darba għal dejjem Adrian Delia.
Wara li Delia lbieraħ mar il-Qorti biex jiftaħ libell lil-lovinmalta, dak is-sit li sa ftit tal-jiem ilu kien jitmexxa minn Chris Peregin, illum strateġista ta’ Bernard Grech, Comodini Cachia ħarġet tattakka lil Adrian Delia u tiddefendi lil-lovinmalta.
Is-sit imsemmi rrapporta li Delia kien qed jibgħat messaġġi lis-suspettat mandat fil-qtil ta’ Daphne Caruana Galizia, Yorgen Fenech, waqt diskussjoni fil-Parlament wara li sar magħruf li Fenech huwa s-sid tal-kumpanija 17 Black.
Delia ċaħad dan u kien għalhekk li mar il-Qorti biex jiftaħ libell iżda Comodini Cachia wieġbet lil Delia taħt kitba li fiha l-eks Kap Nazzjonalista ħabbar li fetaħ il-kawża ta’ libell.
Comodini Cachia, li sa sena ilu riedet tkun Kap tal-Oppożizzjoni flok Adrian Delia, ikkundannat l-aġir ta’ Delia u sejħitlu bħala attakk fuq il-midja, f’dan il-każ il-lovinmalta.
Sa issa l-Partit Nazzjonalista ta’ Bernard Grech ma ħariġx jiddefendi lil Delia wara l-allegazzjonijiet rappurtati fuqu u saħansitra fil-bullettin tal-aħbarijiet tal-istazzjon tal-partit lanqas ġiet rappurtata l-aħbar li Delia mar jiftaħ libell.
Is-sorsi tagħna qalulna li dan il-fatt urta mhux ftit lin-nies ta’ Delia u xi deputati li għadhom jħossuhom parti mill-fazzjoni t’Adrian Delia.
Dawn qed ifakkru wkoll f’dak li kitbu tas-Civil Society Network, li jkunu fil-protesti ma’ tar-Repubblika u Manuel Delia.
Fil-fatt tas-Civil Society Network ftaħru li l-Partit Nazzjonalista mhux jaqbeż għal Adrian Delia.
