L-eks Segretarju Ġenerali Nazzjonalista Clyde Puli pponta t-tort lejn il-fazzjoni estremista tal-Partit Nazzjonalista bħala l-kaġun wara r-riżultat tal-aħħar stħarriġ politiku tal-MaltaToday.
Puli għamel dan hekk kif kien qed jiddiskuti s-suġġett fuq l-istazzjon Nazzjonali l-Ħadd filgħodu waqt programm tal-analiżi tal-ġurnali.
B’reazzjoni għall-istħarriġ politiku, fejn il-Prim Ministru Robert Abela flimkien mal-Partit Laburista komplew jiksbu fiduċja b’saħħitha, Puli fakkar fiż-żmienu meta kien Segretarju Ġenerali tal-istess Partit, hekk kif ġie mistoqsi dwar it-tmexxija ta’ Bernard Grech.
F’botta sottili imma diretta, bla tlaqlieq Puli rrimarka kif anke fi żmienu l-Partit Nazzjonalista, kellu mitt gambetta.
“Id-differenza x’taf x’kienet kontra llum? Li jien kelli mitt proposta, imma kelli mitt gambetta.”
Clyde Puli – L-Eks Segretarju Ġenerali tal-PN
Din il-botta kienet immirata direttament lejn il-fazzjoni estremista Nazzjonalista u l-figuri ewlenin tagħha bħall-Kap de facto Karol Aquilina, ħuh Robert Aquilina tal-għaqda Repubblika u Beppe Fenech Adami.
Dan hekk kif dawn l-istess figuri kienu l-istess persuni li fi żmien Clyde Puli, xekklu kemm felħu lil Adrian Delia u t-tmexxija Nazzjonalista sakemm eventwalment qaċċtuh minn Kap Nazzjonalista. Minfloku dawn l-istess persuni u oħrajn magħhom, bħal Simon Busuttil, Lawrence Gonzi u Jason Azzopardi, poġġew lil Bernard Grech, bil-konsegwenza li ħolqu diviżjonijiet kbar flimkien ma’ pressjoni politika fuq it-tmexxija attwali.
Intant, l-editorjal tal-MaltaToday, ipponta t-tort ukoll għar-riżultat ta’ dan l-istħarriġ, lejn id-Deputat Nazzjonalista Għawdxi Alex Borg, li fl-aħħar jiem f’tentattiv li jikseb ftit popolarità, ħadha qatta bla ħabel kontra l-Professur Kevin Cassar wara artiklu ta’ opinjoni li kiteb fuq The Malta Independent, fejn iddeskrivih bħala ‘Żiemel ta’ Trojja.’
L-editorjal rrimarka kif ir-reazzjoni ta’ Alex Borg ħarġet l-immaturità politika tiegħu. Fil-fatt, l-editur tal-MaltaToday saħansitra ddeskriva l-filmat bir-reazzjoni tiegħu fuq il-midja soċjali bħala ‘teatrin infantili.’
Dan filwaqt li jgħid ukoll kif il-Partit Nazzjonalista llum għandu bżonn ‘team players’ u mhux persuni bħal Alex Borg li jerħulha għal rashom f’tentattiv li jiksbu aktar popolarità politika.
Il-Ħadd filgħodu, il-botti ma’ ġewx biss minn Clyde Puli. Beppe Fenech Adami, wieħed mill-ewlenin tal-fazzjoni estremista tal-PN u li lejh qed jiġi ppuntat it-tort għan-nuqqas ta’ fiduċja fil-Partit Nazzjonalista, ħass li kellu jinforma lil kulħadd li jinsab Ruma għal Ħadd il-Palm.
Persuni mid-Dar Ċentrali u li għamlu kuntatt ma’ din il-kamra tal-aħbarijiet sostnew kif din ma kienet xejn għajr daħka f’wiċċ il-Kap Nazzjonalista. “Jagħmillu l-ħsara minn taħt u jiżżufjetta bih f’wiċċu pubblikament,” temm jgħidilna sors partikolari.
