Waqt attività marbuta mal-kampanja CHOICE f’lukanda ewlenija, il-Ministru għat-Turiżmu Edward Zammit Lewis qal li huwa ta’sodisfazzjon li tara studenti ta’ età pjuttost żgħira li qed juru interess fl-industrija tat-turiżmu.
Fl-ewwel disa’ xhur ta’ din is-sena, Malta diġà laqgħet ’il fuq minn 1.5 miljun turist, żieda ta’ 8.2% iktar mis-sena l-oħra. Kif wieħed jista’ jimmaġina, dawn in-nies kollha joħolqu domanda għal servizzi u prodott ta’ kwalità. Għaldaqstant investiment fil-karrieri fit-turiżmu huwa ferm importanti, saħaq il-Ministru.
Propju minħabba dan, 15-il sena ilu l-Awtorità tat-Turiżmu ta’ Malta nediet il-kampanja CHOICE sabiex tkabbar l-għarfien dwar il-karrieri li jeżistu f’din l-industrija tant vasta. Din il-kampanja hija mmirata għal studenti fl-iskejjel sekondarji, żied jgħid il-Ministru għat-Turiżmu. Dan il-programm joffri lill-istudenti tat-tielet sena sekondarja l-opportunità li jżuru lukandi diversi biex jieħdu għarfien ta’ kif titmexxa u x’karrieri wieħed jista’ jsib.
Il-lista ta’ karrieri hija vasta hekk kif l-industrija tal-akkomodazzjoni b’mod partikolari tirrikjedi ammont kbir ta’ riżors uman sabiex tkun tista’ toffri l-aħjar servizz lit-turisti. L-istudenti għandhom l-opportunità jieħdu sehem f’kompetizzjoni f’forma ta’ kwizz dwar it-turiżmu li jgħin sabiex titħeġġeġ fl-istudent il-kuriżità għal aktar għarfien dwar din l-industrija u l-opportunitajiet sbieħ li toffri fil-ġejjieni tal-istudent. Dan il-kwizz qed jitqassam fl-iskejjel u kif ukoll jinstab fuq is-sit: www.trainedfortourism.org.mt
Dan il-programm jinvolvi ukoll esperjenza ta’ job shadowing. Din l-inizjattiva tnediet seba’ snin ilu, fejn l-istudenti jqattgħu ġimgħa ġewwa xi stabbiliment relatat mat-turiżmu u jsegwu mill-viċin il-karrieri u l-operat tal-ażjenda. Matul is-snin mijiet ta’ studenti ħadu sehem u ibbenefikaw minn dan il-programm, fil-fatt is-sena l-oħra ingħata ċertifikat ta’ rikonoxximent lil 126 student u studenta li għamlu din l-esperjenza.
Matul dik il-ġimgħa ta’ job shadowing dawn l-istudenti segwew karrieri fil-housekeeping, front office, ristorant u kċina u tgħallmu x’ħiliet hemm bżonn biex taħdem f’xogħlijiet diversi. Ħafna studenti espremew sodisfazzjon matul din l-esperjenza u rrikonoxxew l-għarfien u t-tagħlim li ngħataw, tant li wħud mill-istudenti kienu sorpriżi kemm fil-fatt dawn il-karrieri jirrekjedu ħiliet varji. Dan il-programm serva ta’ xprun sabiex diversi studenti ddeċidew li fis-sajf ta’ wara jaħdmu fil-lukanda fejn għamlu din l-esperjenza.
Din is-sena ġie mniedi ukoll brochure ġdid b’tagħrif fil-qosor dwar il-karrieri varji li wieħed isib fit-turiżmu u li ukoll qed jitqassam fl-iskejjel. Il-karrieri f’din l-industrija huma varji u ma jieqfux biss f’xogħlijiet tradizzjonali bħal kok, receptionist jew waiter. Tinvolvi wkoll karrieri tekniċi, fl-informatika, fl-inġinerija, fl-amministrazzjoni u fil-finanzi. Il-garanzija ta’ xogħol f’din l-industrija hija waħda għolja ħafna hekk kif in-numru ta’ turisti qiegħed dejjem jikber u kif ukoll it-turiżmu domestiku kull ma jmur qiegħed dejjem isir aktar popolari mar-residenti f’pajjiżna.
Karriera fis-settur turistiku fiha l-isfidi tagħha bħal kull karriera oħra, madanakollu toffri sodisfazzjon kbir lil min jaħdem fiha. Hemm opportunitajiet kbar għal żvilupp u avvanz u kif ukoll il-pjaċir li tiltaqa’ ma’ ħafna nies u kulturi differenti, kompla jgħid il-Ministru.
Fi kliem il-Ministru għat-Turiżmu, il-Gvern huwa kommess li jkompli jinvesti aktar fir-riżorsi umani partikolarment ġewwa l-Istitut għall-Istudji Turistiċi. Din is-sena ser jibda x-xogħol fuq il-binja l-ġdida tal-ITS, wieħed mill-akbar proġetti li qatt saru għar-riżorsi umani fit-turiżmu meta ser isir investiment ta’ €56 miljun fil-bini ta’ ITS ġdid fi Smart City. Ir-rilokazzjoni se tkun qed tagħti prodott aħjar lill-istudenti u opportunitajiet ġodda.
Fuq livell akkademiku bosta inizjattivi se jissoktaw u kif ukoll jiġu introdotti oħrajn ġodda bħat- tkomplija tal-programm ma’ Haage Helia, l-istudent support services fuq livell ta’ ċertifikat, estensjoni fil-kurrikulu, l-ITS Mobile App, il-ftuħ tal-kors tal-Gwidi part-time mill-inqas darba kull sena u mhux aktar kull tliet snin u l-introduzzjoni ta’ suġġett bi ftehim mal-KNPD biex permezz tiegħu l-istudenti tal-ITS ikunu imħarrġa aħjar f’dak li huma metodi u prattiċi tajba ta’ kif għandek tirrelata ma’ persuni b’diżabilità, stqarr il-Ministru għat-Turiżmu.
Il-Ministru Zammit Lewis awgura kull suċċess lil dawn l-istudenti fl-iżvilupp edukattiv tagħhom, fejn jispera li ’l quddiem numru minnhom jagħżlu karriera fit-turżmu bħala t-triq tagħhom għall-futur.
