Etienne Bonello u Marie Claire Aquilina tat-Team Greens żammew it-titlu ta’ champions Nazzjonali tat-Time Trial organizzat mill-Federazzjoni Maltija taċ-Ċikliżmu. Dan kien suċċess doppju għat-Team Greens bħal ma kienu għamlu s-sena l-oħra. Għal Etienne Bonello din kienet l-erbagħtax il-darba fil-karriera tiegħu li huwa spiċċa champion Nazzjonali tat-Time Trial. Filfatt din is-sena huwa reġa spiċċa l-ewwel fil-klassifika tal-Kategorija Elite meta kiseb 555 punt f’żewġ rebħiet u darba oħra t-tieni post. Sieħbu Clive Ebejer kiseb total ta’ 490 punt, segwit fit-tielet pożizjoni minn Mark Bonnici ta’ Agones SFC bi 385 punt.
Minn naħa tagħha, Marie Claire Aquilina, wkoll tat-Team Greens żammet t-titlu tan-Nisa meta kisbet total massimu ta’ 600 punt bi tliet rebħiet. Għal Aquilina din kienet is-sitt darba li hija spiċċat champion Nazzjonali tat-Time Trial. Warajha spiċċaw rispettivament żewġ ċiklisti oħra sħaba tat-Team Greens, Michelle Vella Wood (435 punt) u Juleanne Vassallo (350 punt).
Luke Borg ta’ The Cyclist spiċċa champion Nazzjonali tal-kategorija ta’ taħt it-23 sena meta spiċċa l-ewwel fil-klassika b’575 punt, miksuba f’żewġ rebħiet u darba oħra t-tieni post. Fit-tieni post spiċċa Stefan Scerri ta’ Gozo CC b’375 punt, filwaqt li Daniel Briffa ta’ Birkirkara St Joseph spiċċa t-tielet b’total ta’ 330 punt.
Ivan Zammit ta’ Birkirkara St Joseph spiċċa champion Nazzjonali fil-Masters 40+, b’575 punt, miksuba f’żewġ rebħiet u darba oħra t-tieni post. Warajh spiċċaw Nicholas Schembri (Team Greens) b’505 punt u Justin Gauci (Mosta AF Sign Studio CC) b’340 punt. Kevin Muscat ta’ Mosta AF Sign Studio CC spiċċa champion Nazzjonali fil-Masters 50+, b’400 punt. Warajh spiċċaw rispettivament Mario Attard (Team Greens) b’200 punt u Emmanuel Camilleri (Mosta AF Sign Studio CC) b’155 punt.
Jacob Schembri ta’ Mosta AF Sign Studio CC spiċċa bħala champion Nazzjonali tal-Juniors b’total massimu ta’ 600 punt. Dareen Sultana ta’ Gozo CC spiċċa t-tieni b’ 175 punt. Ishmael Grima ta’ Shamrock Stars spiċċa bħala champion Nazzjonali ta’ taħt is-16 il-sena b’total ta’ 400 punt. Warajh spiċċaw rispettivament Matthew Galea (Gozo CC) bi 350 punt u Kai Azzopardi (Agones SFC) b’200 punt.
Ryan Gatt ta’ The Cyclist spiċċa bħala champion Nazzjonali ta’ taħt l-14 il-sena b’total ta’ 400 punt. Warajh spiċċaw żewġ ċiklisti ta’ Mosta AF Sign Studio CC, Sean Mercieca (175 punt) u Jonas Micallef (155 punt). Ethan Grech ta’ Mosta AF Sign Studio CC spiċċa bħala champion Nazzjonali ta’ taħt it-12 il-sena Subien b’total ta’ 295 punt. Warajh spiċċa fit-tieni post sieħbu Benjamin Bugeja bi 285 punt, filwaqt li żewġ ċiklisti spiċċaw fit-tielet post b’200 punt kull wieħed, Samwel Attard (Mosta AF Sign Studio CC) u Liam Daly (Shamrock Stars). Nina Debono ta’ Shamrock Stars spiċċat bħala champion Nazzjonali ta’ taħt it-12 il-sena Bniet b’total ta’ 400 punt. Warajha spiċċat Katie Vella Wood tat-Team Greens b’175 punt.
