Waqt il-programm Arena taħt it-tinda f’Ħad-Dingli, id-Deputat Mexxej tal-Partit Laburista Chris Cardona innota li l-fatt li meta jkollok riżultati ekonomiċi, in-nies m’għadhomx ikunu sorpriżi.
Minkejja li erba’ snin ilu l-poplu kien dera jisma’ sena wara oħra li hemm l-inkwiet u li t-tkabbir ekonomiku mhux qed jirranka, dan kollu kien indera. Kien grazzi għat-tmexxija tal-Gvern ta’ Joseph Muscat li f’erba’ snin inbidlet ir-rotta. Filwaqt li qabel konna f’sitwazzjoni ta’ dejn li dejjem jikber, issa ninsabu b’ċertifikati pożittivi li xahar wara ieħor u sena wara oħra, il-pajjiż dejjem qed imur għall-aħjar.
Cardona semma kif l-istatistika li ħarġet illum turi kif fl-ewwel xhur tal-2017 il-Fond Konsolidat irreġistra surplus ta’ €21 miljun; l-aqwa surplus illi qatt ġie rreġistrat mill-Fond Konsolidat għal dan il-perjodu f’pajjżna
Id-Deputat Mexxej tal-PL spjega li dan il-Gvern huwa wieħed mill-aktar Gvernijiet li rnexxielu jattira investiment dirett barrani, minkejja li l-Prim Ministru ġie mgħajjar. Dan għax Joseph Muscat hu Prim Ministru li jgħid ftit iżda jwettaq ħafna. Spjega li l-konsm lokali, ġifieri dak li jonfqu l-familji, qed juri riżultati tajbin ħafna, għax in-nies issa għandhom iktar flus fil-but.
Cardona qal li rapport tal-Moodys, li ħareġ madwar ġimgħtejn ilu, bassar li għalkem din is-sena l-pajjiż għandu elezzjoni ġenerali, jekk il-pajjiż jibqa’ miexi bl-istess tmexxija li qed imexxi l-Prim Ministru, mistenni surplus għal sena oħra. Din hi riflessjoni ta’ politika ta’ Gvern ta’ galbu li qed iwassal għal tkabbir ekonomiku.
Meta mistoqsi dwar is-settur tal-iGaming, Cardona sostna li waslet informazzjoni interna li partitarji tal-Partit Nazzjonalista qed ibeżżgħu lill-ħaddiema li jekk jitla’ Joseph Muscat, dan is-settur se jgħereq. Qal li propju ġimgħa ilu, Finance Malta, kellha konferenza li fiha kien hemm esperti fis-settur, fosthom Lord Jonathan Marland. Dan qal li s-settur finanzjarju f’Malta hu b’saħħtu, għax il-pajjiż għandu regolatur tajjeb. Semma wkoll kif f’intervista fuq ġurnal lokali mal-Kap Eżekuttiv ta’ Grant Thornton, dan tal-aħħar qal li minn skala ta’ 1 sa 10, Malta ġġib l-aħjar punteġġ, dak ta’ 9+ u dan għaliex għandna sisien finanzjarji tajbin f’pajjiżna. Cardona qal li kieku vera dan is-settur sejjer ħażin, żgur mhux forsi li dawn in-nies mhux se jkunu qed jitkellmu hekk. Dan is-settur se jkompli jikber fl-erba’ snin li ġejjin.
Id-Deputat Mexxej tkellem dwar kif erba’ snin ilu Joseph Muscat kien jitkellem u jassigura li se jkollna eko-sistema tajba għan-negozjanti, fejn meta se jkun qed imexxi hu se jkun pro-business. Dwar dan, kien hemm nies li kienu xettiċi. Iżda llum in-negozjanti qed jirrikonoxxu li Joseph Muscat kellu raġun u dan għax tul dawn l-erba’ snin irnexxielu joħloq bilanċ.
Sostna li għalkemm fadal xi jsir, ma rridux ninsew li l-Gvern ta’ Joseph Muscat se jibqa’ msemmi għal dak il-Gvern li b’kuraġġ u diterminazzjoni għaqqad l-Unjins wara r-riforma fil-paga minima.
Dwar il-kritika tal-Partit Nazzjonalista dwar is-settur tax-xogħol, Cardona qal li r-risposta għal din il-kritika ngħata din il-ġimgħa f’attività politika f’Birkirkara minn mara li mpjegata fit-tindif fejn sostniet li fit-3 ta’ Ġunju se tkun qed tivvota għall-ewwel darba lill-PArtit Laburista – dan għax rat differenza u għax esperjenzat differenza fil-paga li għandha u anke fil-kundizzjonijiet tax-xogħol.
Cardona qal li kien Gvern Laburista li ġab l-ikbar investiment fin-Nofsinhar ta’ Malta, li se jibqa’ mfakkar għall-ikbar investiment fis-saħħa fis-settur tal-edukazzjoni, dik tal-iskola ta’ Barts, li kieku kien għal PN dan kien ikeċċihom. Hu qal li din turi l-kredibilità tal-Partit Laburista u li Joseph Muscat xegħel lil Malta bil-ġid li kattar f’dawn l-erba’ snin li għaddew.
Cardona semma kif dan il-Gvern ta l-possibiltà tal-imħabba lill-koppji tal-istess sess, il-possibiltà lill-koppji li jsiru ġenituri għall-ewwel darba, u lill-ġenituri li issa qed jaraw lit-tfal b’diżabiltà jqumu kull filgħodu u jmorru x-xogħol. Dan hu l-prinċipju tal-imħabba, prinċipju kontra l-mibgħeda.
Meta qabbel id-differenza bejn il-partit ta’ koalizzjoni konfużjoni u l-Partit Laburista, Cardona qal li meta erba’ snin ilu l-Gvern ta’ Gonzi tilef il-maġġoranza, inħolqot instabbiltà u staġnar fil-pajjiż. Spjega kif f’dawn l-aħħar jumejn intwera biċ-ċar li Simon Busuttil u Marlene Farrguia ma bdew jaqblu fuq xejn; wieħed favur il-kaċċa u Marlene kontra, Busuttil favur it-trakka f’Ta Qali u Marlene kontra. Qal li dawn mhux qed jaqblu issa li mhumiex fil-Gvern aħseb u ara jekk ikunu. Spjega kif il-koalizzjoni konfużjoni l-unika ħaġa komuni bejniethom hi l-mibgħeda u li din mhix koalizzjoni ta’ partit magħqud bħal dik tal-Partit Laburista.
Semma dwar kif hu jaf li għad hemm nies hemm barra li huma mweġġa’ fejn qal “ngħidilhom li inthom minthomx ineżistenti għalina. Din hi realtà u l-isfida tagħna ta’ kuljum. Iżda l-mistoqsija li rridu nagħmlu; lil min tafdaw biex jindirizzalkhom it-tbatijiet li għaddejtu minnha u l-problemi li għandkom? Joseph Muscat jew lil koalizzjoni ta’ konfużjoni?”
Hu kkonkluda billi qal li l-bżonn hu li ma nbidlux it-triq u ma nibdlux id-direzzjoni. Cardona qal li l-manifest elettorali tal-ħames snin li ġejjinhu ferm akbar minn dak li nħoloq fis-snin li għaddew. Manifest elettorali li hu ferm superjuri iktar minn dak ta’ Tagħna Lkoll.
