Ħamsin student minn sebat iskejjel sekondarji tal-Istat ġew ippreżentati b’ċertifikat talli temmew b’suċċess il-programm ta’ Sport Career Development.
Dan il-programm, li tnieda ħames snin ilu, għandu l-għan li jagħti aktar importanza lill-isport fl-iskejjel filwaqt li l-istudenti jkollhom l-opportunità li jkomplu jwessgħu l-orizzonti tagħhom f’dan il-qasam.
Fil-fatt, permezz ta’ dan iċ-ċertifikat, li huwa ta’ livell MQF 2 jew 3, l-istudenti jistgħu jkomplu l-vjaġġ edukattiv tagħhom f’livell postsekondarju fosthom fl-MCAST, l-ITS, il-Higher Secondary, il-GEM16+, f’De La Salle, u saħansitra fis-Sixth Form t’Għawdex.
Fost dawn il-ħamsin student kien hemm Yannick Vella, li għandu tant għal qalbu l-futbol.
Qal, “Il-programm tal-SCDP għeni għall-ħajja ta’ kuljum u peress li nħobb ħafna l-futbol kelli session oħra l-iskola. Allura bqajt iktar attiv.”
Iżda Yannick ma kellux biss sessjonijiet ta’ futbol. Dan il-programm huwa msejjes b’tali mod li lil Yannick xorta waħda tagħtih edukazzjoni ħolistika.
Dan spjegah l-uffiċjal tal-edukazzjoni, Kevin Azzopardi.
Stqarr, “Ridna li l-programm, il-pakkett li qegħdin noffru lill-istudenti, ikun wieħed komplut. Nafu illi, min jixtieq jagħmel karriera fil-futbol, importanti ħafna li jkun jaf fuq informazzjoni dwar anti-doping, dwar nutrizzjoni, dwar first-aid. Anki jekk forsi, għada pitgħada, il-karriera ma tkomplix kif wieħed jixtieq, jista’ jaqbad karriera oħra fl-isport.”
Min-naħa tiegħu l-Ministru responsabbli mill-Edukazzjoni, Clifton Grima, irrimarka li kull student u studenta għandu jkollhom l-opportunità li jilħqu l-aspirazzjonijiet u l-ħolm tagħhom, saħansitra fl-isport.
Qal, “Illum qegħdin naraw l-ewwel grupp ta’ studenti li, wara ħames snin jieħdu taħriġ, jieħdu t-tagħlim, jiġu edukati f’dan is-settur tant popolari, tant importanti, qegħdin proprju jieħdu ċertifikazzjoni li permezz tagħha jistgħu jkomplu dak li huwa l-istudju tagħhom u fuq kollox ikomplu jimmaturaw, ikomplu jiżviluppaw, sabiex għada pitgħada, għalfejn le, ikollok ħiliet, aktar għodda, li permezz tagħhom jistgħu jilħqu karriera u dixxiplini differenti.”
Bħalissa madwar elf student f’Malta u Għawdex qegħdin isegwu dan il-programm.
