Fi stqarrija insensittiva għall-aħħar, id-Deputat Nazzjonalista Ivan Castillo sostna li l-għoli tal-ħajja hu aktar stressanti minn mewt ta’ membru tal-familja. Irreferiet dwar dan il-gazzetta KullĦadd, waqt li wkoll spjegat kif l-istatistika reġgħet uriet li mhix il-forte ta’ Castillo, wara li reġa’ kkwota ħażin ċifri oħrajn biex jagħmel din id-dikjarazzjoni insensata.
Il-kelliem Nazzjonalista sostna li tant hawn għoli tal-ħajja, li l-familji ma jistgħux jaffordjaw l-għajxien tagħhom, fl-istess ħin li jsostni li t-tkabbir ekonomiku ta’ pajjiżna hu kollu dovut għal żieda fil-konsum privat.
Imma aktar inkwetanti minn hekk, Castillo semma studju tal-Università ta’ Malta dwar diffikultajiet finanzjarji tal-familji f’pajjiżna, li, skontu, wasslu stress akbar mill-imwiet ta’ membri tal-familja.
Iżda meta wieħed jaqra r-rapport, li għalih qed jirreferi Ivan Castillo, isib li l-istħarriġ jgħid li kienu 16.8% tal-persuni intervistati li għaddew minn problemi finanzjarji. B’kuntrast, 81.8% kellhom mewt fil-familja, b’40% minnhom isostnu li dan wassal għal problemi psikoloġiċi qawwija għalihom.
Li jfisser li allura terz ta’ dawk kollha intervistati qalu li mewt ta’ membru fil-familja ħalla effetti qawwija fuqhom, bla referenza jew tqabbil mal-għoli tal-ħajja.
Meta wieħed iħares ukoll lejn dawk il-16.8% li għaddew minn problemi finanzjarji, 49.3% minnhom jgħidu li dan ħalla effetti psikoloġiċi qawwija fuqhom.
Il-KullĦadd, għalhekk, qalet li allura jfisser li kienu biss 8% minn dawk kollha intervistati li qalu li sofrew minn effetti psikoloġiċi qawwija minħabba diffikultatjiet finanzjarji.
Dan hu inqas minn kwart ta’ dawk li sofrew minħabba mewt fil-familja. Dan juri kemm il-Kelliem Nazzjonalista kien żbaljat fil-konklużjonijiet tiegħu, li b’mod qarrieqi wkoll ipprova jimplika li l-istudju tal-Università sar fuq diffikultajiet finanzjarji preżenti taħt Gvern Laburista.
Iżda l-istħarriġ staqsa lill-persuni, inklużi anzjani, jekk matul ħajjithom kollha għaddewx minn xi problemi finanzjarji. Li jfisser li mill-ftit li sostnew li għaddew minn problemi finanzjarji f’ħajjithom, proporzjon sinifikanti setgħu faċilment għaddew minn dawn il-problemi fil-25 sena ta’ tmexxija ta’ Gvernijiet Nazzjonalisti sal-2013.
Dak iż-żmien l-ammont ta’ dawk f’qagħda ta’ ċaħda materjali severa kien tliet darbiet akbar minn dak preżenti.
Dan l-episodju minn Castillo mhux iżolat, iżda jiżdied mat-taħwid riċenti tiegħu fejn wera kemm hu wkoll inkapaċi fil-qasam ekonomiku u soċjali.
L-aħħar taħwida tiegħu seħħet ftit jiem biss ilu meta kien iddikjara li statistika tal-Eurostat qalet li l-pagi f’Malta huma l-inqas fl-Ewropa.
Biex imbagħad ħareġ l-Uffiċċju Nazzjonali tal-Istatistika jikkjarifika li dan ma kienx minnu. Anzi l-NSO qal li l-istatistika kkwotata minn Castillo kienet turi li l-piż fuq min iħaddem f’Malta hu l-inqas fl-Ewropa, minħabba piż inqas ta’ bolla u taxxa.
