Minn żmien għal żmien nisimgħu b’appelli mill-bank tad-demm għad-donazzjonijiet, u s-Sajf mhux eċċezzjoni.
Għalkemm il-ħażna għal dan iż-żmien ikunu ilhom jaħsbu għaliha, biex ma jinqabdux fuq sieq waħda, l-inċidenti tat-traffiku, l-operazzjonijiet, u l-mard li jiddependi mill-għoti tad-demm, iżidu l-isfida tal-provvista tad-demm.
Iltqajna ma’ Alexander Lautier, li jaħdem fil-bank tad-demm, li qalilna li l-inċidenti tat-traffiku huma wħud mir-raġunijiet għaliex il-ħidma biex jiżdiedu d-donaturi hija waħda kostanti.
Qal, “Hemmhekk id-domanda tad-demm tikber fejn f’operazzjoni, bniedem ikollu bżonn 4 jew sitt boroż demm, f’dawn il-każijiet ġieli ħarġu madwar 40, 50 , 60 borża ta’ demm f’dak l-inċident waħdu.”
Lautier fisser kif fil-prinċipju, kull min hu f’saħħtu u għandu bejn sbatax u tmienja u sittin sena jista’ jagħti d-demm.
Qal, “Importanti li bniedem jiġi jagħti d-demm għaliex jekk ma jkollniex demm fuq l-ixkafef allura jistgħu jieqfu l-operazzjonijiet li huma skedati u anki dawk li huma urġenti u anke jistgħu anke jintilfu l-ħajjiet.”
Bħalissa fir-riżerva tad-demm hemm defiċit għal demm O positive u A Positive, fost oħrajn. Dan ifisser li pazjenti b’mard li jeħtieġ kontinwament id-demm, speċjalment dawk bil-marda tal-Kanċer, u biex saħansitra jitkomplew isiru l-operazzjonijiet, kull min hu b’saħħtu għandu jersaq u jmur jagħti d-demm, mill-aktar fis possibli.
Lautier qalilna li llum il-Bank Nazzjonali tad-demm, biex jagħmilha aktar faċli għad-donaturi, qed joffri servizz għal min m’għandux trasport biex imur jagħti d-demm.
Qal, “Billi wieħed illi jkun ħa jiġi jcemplilna fuq 79 307 307 jew 2206 6201 jagħtina t-triq fejn qiegħed, il-post u aħna nibgħatulu t-transport b’xejn u aħħna nerġgħu noffruh anki lura.”
Qatra demm tiswa ‘mitqlu deheb’. Iltqajna mal-attur Leonard Falzon li l-għotja tiegħu tad-demm il-Ħadd, kienet ta’ ’l fuq mill-għoxrin waħda.
Qal, “Qed nagħti d-demm għal ħaddieħor, għada pitgħada nista’ nkun jien. Jiena kelli inċidenti wkoll. Barra minn hekk, hija donazzjoni b’xejn, ma tiswiex flus.”
‘Bil-qatra l-qatra timtela l-ġarra’. Tkellimna wkoll ma’ Joseph Pellicano li għamel appell lill-pubbliku nġenerali.
Qal, “Fil-ħajja nistgħu nagħtu l-ħin tagħna, nistgħu nagħtu flus imma bl-għoti tad-demm qed nagħtu s-saħħa u anki l-ħajja lil ħaddieħor, jiġifieri nappella verament biex min jista’ jagħti ftit tal-ħin, forsi ftit sagrifiċċju u kuraġġ imma ċertament qed tagħmel xi ħaġa li ħafna nies qed igawdu minn wkoll.”
‘Kull qalb trid oħra.’ Is-sopran Ruth Sammut Casingena tgħarrfitilna għaliex tħoss li hu importanti li tkun altruwista fil-ħajja u tagħti d-demm.
Qalet, “Kollha kemm aħna nsibu l-ħin x’nixtiequ nagħmlu imma jien inħoss li l-aktar ħaġa importanti fil-ħajja hija meta tgħin lil ħaddieħor u sservi b’xi mod biex tagħmel ġid lil ħaddieħor u tagħmel differenza fil-ħajja ta’ ħaddieħor. Li tagħti d-demm hija xi ħaġa personali tiegħek b’xejn u u naħseb l-aktar li tiswa. Inħoss li għandi nagħti d-demm għax hija l-aktar waħda rewarding, li nħoss li nista nagħmel f’ħajti, u fost dawk l-affarijiet kollha li nsib għalihom din hija l-iktar ħaġa importanti u prezzjuża li nosta nagħti lil ħaddieħor.”
Għaldaqstant, jekk qed titħajjar issalva l-ħajja u tagħti d-demm f’dawn il-jiem sajfin, għandek tixrob ħafna ilma u żżur il-bank tad-demm, mit-tmienja u nofs ta’ filgħodu sas-sitta ta’ filgħaxija, kuljum, m’hemmx Ħdud u festi. Ħu dokument ta’ identifikazzjoni u maskra bħala prekawazjoni, u mur agħti d-demm.
