Il-kap tal-oppożizzjoni llejla ta’ lil wieħed x’jifhem li jekk il-Maġġur Eugenio Caruana ma jiġix irtirat mill-ħidma tiegħu ta’ sigurtà fil-Parlament, u l-iSpeaker jiddeċiedi li jżommu, il-membri nazzjonalisti jirregulaw ruħhom huma. Huwa qal lil Farrugia li l-ewwel dmir u lealtà tiegħu għandha tkun lejn min ġie elett fil-Parlament u widdbu: “Iġġiegħilx lilna nagħżlu bejn li nidħlu fil-parlament jew le”.
Busuttil qal li l-obbligu għandu jkun li pulizija fil-Parlament, nazzjonalisti jew laburisti, jaqdu d-dover b’lealtà lejn kulħadd. Huwa qal li Caruana dan m’għamlux għax mhux biss attakka lil membri tal-oppożizzjoni fuq Facebook qabel ingħata l-aħħar ħatra izda anke kkritika lill-arċisqof.
Busuttil qal dan wara li l-ispeaker ġibed l-attenzjoni tal-membru parlamentari nazzjonalista Claudette Buttigieg għal artiklu li kitbet fil-Malta Indipendenti tikkritika r-ruling li l-ispeaker ta l-ġimgħa l-oħra dwar il-kwistjoni.
Huwa kien qal li kien ġie assigurat mill-Maġġur Caruana li kien għalaq l-account tiegħu ta’ facebook. L-ispeaker qal li huwa għajjat lil Caruana u infurmah li jrid jaqdi dmiru b’lealtà sħiħa lejn kull membru tal-Kamra.
Illejla, l-ispeaker Farrugia qal lil Buttigieg li hemm proċedura kif tattakka ruling tal-ispeaker iżda dan m’għamlitux.
Huwa qal ukoll li l-Maġġur Caruana kitiblu u skuża ruħu formalment ma’ kull min seta’ weġġa’ bil-kitba tiegħu.
L-Ispeaker, fl-aħħarnett, qal li huwa kien se jidħol f’dak li talab il-Kap tal-Oppożizzjoni.
