“Mar-riformi kbar li saru fil-qasam tal-ġustizzja fl-aħħar snin, dan il-budget qed juri li l-Gvern qed jieħu lil dan il-qasam bis-serjetà.”
Hekk stqarr il-Ministru għall-Ġustizzja Edward Zammit Lewis f’konferenza tal-aħbarijiet bit-tema ‘Malta li rridu għal uliedna fejn ta rendikont tar-riformi li saru f’dan il-qasam u spjega l-investimenti li l-budget għas-sena d-dieħla qed jalloka fondi għalihom.
Fost l-oħrajn spjega kif l-budget għas-sena d-dieħla qed jalloka żieda ta’ 45% għal investimenti fuq proġetti ġodda. Dan filwaqt li qed ikunu allokati 20% iżjed fondi sabiex ikunu rekluti iżjed ħaddiema fil-Qrati u b’hekk tkompli tiżdied l-effiċjenza.
Huwa qal, “Hemm postijiet fejn sejrin tajjeb ħafna, hemm postijiet fejn iridu jiġu indirizzati, hemm il-Qorti tal-Familja, il-Qorti tal-Appell bi tliet imħallfin, u dawn irridu nibqgħu naħdmu fuqhom. U dan il-budget kif għidt tajjeb inti jrid jiġi indirizzat biex fejn hemm dawn l-ineffiċjenzi nġibuhom effiċjenti però mhux a spejjeż tal-kwalità li jistgħu joffru l-imħallfin u l-maġistrati tagħna.
Bi proċess li se jibqa’ għaddej sal-2025, kull tip ta’ prosekuzzjoni kriminali se ssir mill-avukat ġenerali. Biex dan ikun possibbli l-budget qed jalloka żieda ta’ 80% sabiex isir investiment f’aktar avukati għal dan l-uffiċċju.
L-uffiċju tal-Avukat tal-Istat ukoll ġie allokat miljun ewro biex ikompli għaddej bil-proġetti kapitali tiegħu u żieda ta’ 32% li ser ikunu investiti fl-operat u r-riżorsi umani.
Il-Ministru semma wkoll l-asset recovery bureau li nħoloq fl-2015 sabiex ikun żgurat li oġġetti li jkunu ġew ikkonfiskati f’aġir kriminali, meta jinbiegħu jittieħed il-valur kollu tagħhom u dan isir b’mod trasparenti. Dan filwaqt li jekk l-oġġett ikun ser jiġi rritornat lil sidu dan ikun għadu fi stat tajjeb. Spjega li għal dan il-għan hemm żieda fil-budget ta’ 150%.
Semma wkoll kif fost l-oħrajn l-uffiċju tal-avukat tal-għajnuna legali ser jara investiment biex dan is-servizz imur online ukoll. Spjega wkoll kif huwa pjanat li permezz ta’ investiment minn fondi Ewropej is-sezzjoni tal-kondotti tingħadda f’idejn id-dipartiment tal-ġustizzja u ma tibqax f’idejn il-korp tal-pulizija.
Il-Ministru Zammit Lewis temm jgħid kif dan il-budget jirrifletti l-viżjoni tal-Gvern li l-ġustizzja tkun waħda li ma tħares lejn wiċċ ħadd bil-Qrati Maltin kull ma jmur ikunu iżjed effiċjenti.
