L-ewwel indikazzjonijiet juru li l-Partit Laburista rebaħ l-elezzjoni ġenerali 2022.
Wara li bdew jittieħdu s-samples hekk kif il-voti nqelbu wiċċhom ’l fuq, jidher li l-Partit Laburista rebaħ din l-elezzjoni ġenerali.
Din ir-rebħa taħt it-tmexxija ta’ Robert Abela hija meqjusa waħda storika mmens hekk kif għall-ewwel darba fl-istorja, il-Partit Laburista ikun rebaħ tliet elezzjoni konsekuttivi bl-akbar maġġoranza ta’ voti mitfugħa.
Din hija l-ewwel darba wkoll li partit f’Malta se jkun kiseb 50% u aktar tal-voti għal tliet elezzjonijiet konsekuttivi.
B’din ir-rebħa ngħata l-ewwel mandat lil Dr Abela li issa qed jiġi kkonfermat Prim Ministru ta’ Malta u wieħed jistenna li għada huwa jkun qed jieħu l-ġurament mogħti mill-President ta’ Malta Dr George Vella.
Ta’ 44 sena, Robert Abela se jkun qed isir Prim Ministru għat-tieni darba wara li laħaq Mexxej tal-Partit Laburista sentejn ilu u sar ukoll il-Kap tal-Gvern Malti.
