F’konferenza tal-aħbarijiet fil-Ministeru tas-Saħħa, il-Ministru tas-Saħħa Chris Fearne ħabbar li tifla ta’ 12-il sena residenti f’Malta ttestjat fil-pożittiv għall-Coronavirus.
It-tifla hija f’kundizzjoni tajba u qed tinżamm għall-osservazzjoni ġo sala ta’ iżolament fl-Isptar Mater Dei.
It-tifla, flimkien ma’ oħtha u l-ġenituri tagħha, huma Taljani imma jgħixu f’Malta.
Il-familja kienet vaganza fi Trentino fl-Italja fil-bidu ta’ Marzu u waslu f’Malta minn Ruma t-Tlieta li għadda. Jumejn ilu, it-tifla ta’ 12-il sena bdiet tħoss xi sintomi ta’ deni u uġiegħ fi griżmejha u l-ġenituri tagħha kkuntattjaw id-Dipartiment tas-Saħħa fejn sarilha swab bil-lejl u dalgħodu ħareġ riżultat pożittiv.
Kemm iż-żewġt ibniet u l-ġenituri segwew il-pariri tad-Dipartiment tas-Saħħa u kif waslu minn Ruma żammew lilhom infushom fi kwarantina, jiġifieri t-tfal ma marrux l-iskola u l-ġenituri ma marrux xogħol u ma ħarġux mir-residenza tagħhom.
Sal-bieraħ, apparti Malta, kienu biss Ċipru u l-Bulgarija, il-pajjiżi fl-Ewropa li ma rrappurtawx każijiet ta’ coronavirus.
Il-Ministru Fearne qal li l-Gvern ilu xhur jaħdem fuq pjan ta’ tħejjija u qed isir screening tal-passiġġiera kollha li jidħlu f’pajjiżna. Sa issa saru 323 swab fuq passiġġieri.
Il-helpline 21324086 qed jirċievi eluf ta’ telefonati kuljum u l-Ministru ħabbar li mil-lum fetaħ helpline ġdid 111 biex persuna li jkollhom dubji li għandhom sintomi, iċemplu fuqu.
Ħabbar li mit-Tlieta li ġej se jinfetaħ hub ġdid imsejjaħ testing hub fejn persuni li jkollhom bżonn swabbing ikunu jistgħu jmorru hemmhekk. Se jkun post iżolat fejn il-professjonisti jkunu jistgħu jaħdmu b’aktar effiċjenza.
Ikkonferma wkoll rapporti fil-midja li l-Isptar Boffa qed jitbattal mill-pazjenti bħala prekawzjoni biex jekk it-30 sodda lesti bħalissa għall-iżolament jimtlew, ikun hemm sittin sodda oħra fl-Isptar Boffa. Kull min għandu appuntament l-Isptar Boffa mhux se jiġi affettwat għaliex għalissa, is-servizz ta’ dermatoloġija se jibqa’ jingħata minn hemmhekk.
Fl-aħħar ġimgħat ukoll aktar minn 600 ħaddiem tas-saħħa sarilhom taħriġ li se jkompli jsir skont il-bżonn.
F’każ li jkun hemm każ Għawdex, il-pazjent jinġieb Malta.
Dwar it-tagħmir protettiv, il-Ministru qal li pajjiżna huwa mħejji sew iżda nhar it-Tnejn se jaslu 32,000 maskra oħra.
Spjega wkoll li l-Unjoni Ewropea se tibda proċess ta’ aġġudikazzjoni biex tħaddem mekkaniżmu li l-Unjoni Ewropea tixtri l-ilbies protettiv hi u jintuża fl-Ewropa skont il-ħtieġa.
Se jibda wkoll proċess ta’ joint procurement għal meta jkun hawn vaċċin biex tkun il-Kummissjoni Ewropea li tqassam skont il-ħtieġa tal-membri Stati Ewropej.
Preżenti għall-konferenza tal-aħbarijiet kien hemm ukoll il-Kap Eżekuttiv tal-Isptar Mater Dei Celia Falzon, il-Kap tad-Dipartiment tal-Patoloġija Dr. Christopher Barbara, is-Supretendent tas-Saħħa Pubblika l-Professur Charmaine Gauci u l-Kap tat-Taqsima tal-Prevenzjoni tal-Infezzjonijiet tal-Isptar Mater Dei l-Professur Michael Borg.
http://www.one.com.mt/2020/03/07/dirett-segwi-l-konferenza-tal-ahbarijiet-brabta-mal-ahhar-zviluppi-dwar-il-coronavirus-fmalta-2/
