Is-26 ta’ Diċembru, magħrufa bħala Boxing day, hija tradizzjoni magħrufa immens li tiġi ċċelebrata f’diversi pajjiżi u għal bosta hija festa pubblika.
Hija festa li oriġinat fir-Renju Unit fiż-żmien ir-Reġina Victoria li mas-snin daħlet fil-kalendarju ta’ pajjiżi oħra.
Jingħad li lura fis-seklu dsatax din it-tradizzjoni bdiet minn kif f’din il-ġurnata s-sinjuri kienu jħallu lis-sefturi tagħhom jmorru d-dar fejn familthom filwaqt li jtuhom kaxxa mimlija affarijiet bħala rigal tal-Milied. Huwa mifhum li s-sefturi li kienu jmorru jqattgħu l-ġurnata mal-familja tagħhom u jqassmu kaxxa bir-rigali ukoll bħala ġest ta’ apprezzament u mħabba.
Din il-kaxxa li kienu jqassmu lill-qrabathom, ħbieb u kollegi kienet tissejjaħ ‘Christmas Box’ u minn hawn beda l-użu tal-kelma boxing day.
Il-knisja kellha sehem importanti ukoll fil-ħolqien tat-tradizzjoni ta’ Boxing Day. Fil-parroċċi tal-irħula, l-għada tal-Milied kienet tinfetaħ kaxxa ta’ donazzjonijiet miġbura minn nies ta’ dik l-istess paroċċa biex jingħaddew lill-foqra. F’din il-ġurnata jitfakkru dawk il-persuni li huma fil-bżonn u l-importanza tal-għoti ta’ flus għall-karità. Illum il-ġurnata, din il-kaxxa ta’ donazzjonijiet m’għadiex daqsekk popolari però xorta għad hemm użanza fl-Ingilterra li dakinhar uħud jagħtu xi flus żejda lil dawk it-tfal li jqassmu l-gazzetti fil-ġimgħat ta’ qabel il-Milied.
F’dan il-jum il-Knisja tiċċelebra wkoll il-festa tal-martri San Stiefnu.
Ħafna Ingliżi, il-festa bankarja ta’ Boxing Day tfisser ukoll li jieklu dak li jkun fadal mill-ikel tal-Milied. Ngħiduha kif inhi, kulħadd jipprepara ikel żejjed għal Jum il-Milied u b’hekk it-tradizzjoni tagħhom hija li mid-dundjan li jifdal jagħmlu s-sandwiches u t-torti.
Għal pajjiżi oħra fosthom Malta, il-Kanada u l-Awstralja Boxing Day hija magħrufa għall-ġurnata li fiha jibdew l-iskontijiet ta’ wara l-Milied fil-ħwienet. Għalhekk huma bosta l-familji li f’din il-ġurnata joħorġu biex filwaqt li jgħaddu ġurnata flimkien, jonfqu xi ħaġa żejda u jiddobbaw xi prodotti bi prezzijiet imraħsa.
