Qabel jiltaqgħu l-mexxejja Ewropej għall-Kunsill Ewropew iktar tard illum, fil-fora demokratiċi madwar l-Ewropa għaddejjin botti u risposti.
Il-kanċillier Ġermaniża Angela Merkel għamiltha ċara dalgħodu fil-Parlament Ġermaniż li mhux se jkun hemm negozjati mal-gvern Ingliż qabel ma jkun attwat artiklu 50 tat-Trattat li jipprovdi l-proċedura ta’ tluq ta’ pajjiż mill-Unjoni Ewropea.
Hija saħqet li meta pajjiż jagħżel li ma jkunx parti mill-Unjoni Ewropea li toffri l-libertajiet ta’ moviment ta’ affarijiet, servizzi, persuni u kapital ma jistax 
jippretendi li jibbenefika minn vantaġġi ekonomiċi tal-istati Membri.
Pront kien Nigel Farage, esponent ewlieni tal-kampanja ‘Leave’ fl-Ingilertta, li f’ sessjoni tal-Parlament Ewropew dalgħodu qal li jistenna li l-Unjoni Ewropea tħalli r-Renju Unit igawdi mis-sistema ta’ tariffi t’esportazzjoni tal-istati membri.
Għaliex jekk dan ma jsirx, sostna Farage, ħaddiema Ewropej, bħal dawk Ġermaniżi se jitilfu l-impjieg tagħhom minħabba nuqqas t’esportazzjoni lejn ir-Renju Unit.
Farage intlaqa’ b’għajjat ta’ diżapprovazzjoni meta fil-Parlament Ewropew saħansitra qal li pajjiżu ikun f’ pożizzjoni aħjar jekk ma jkollux ftehim mal-Unjoni wara Brexit milli l-pożizzjoni li kien fiha bħala membru sħiħ.
Minkejja li Merkel, fil-jiem li għaddew uriet l-id tal-ħbiberija u qalet li se tħalli r-Renju Unit jieħu l-ħin tiegħu biex jibda l-proċeduri ta’ tluq, l-istess id mistennija tinbidel f’ waħda tal-azzar meta jibdew in-negozjati għall-futur tar-relazzjoni bejn l-Unjoni Ewropea u r-Renju Unit. Mossa li mistennija tgerrex attentati ta’ referenda oħra f’ Stati Membri oħra.
Iktar ma tisħon il-qiegħa, iktar tikber l-antiċipazzjoni għall-working dinner tal-lejla bejn il-mexxejja tal-Istati Membri, fosthom David Cameron fejn se jkunu diskussi għall-ewwel darba l-implikazzjonijiet politiċi u l-konsegwenzi ta’ Brexit.
