Meta t-Tlieta filgħaxija tkompla l-kampjonat tal-ewwel diviżjoni tal-federazzjoni Boċċi, Żebbuġ telgħu wahedhom fl-ewwel post tal-klassifika hekk kif fil-logħba tal-ġurnata f’darhom għelbu lil Msida bl-iskor ta’ 21-20. Kif jixhed ir-riżultat kienet logħba kumbattuta u sabiħa li ġiet deċiża fl-aħħar ġugata.
Qabel din il-logħba, iż-żewġ timijiet kienu qed jaqsmu l-ewwel post tal-klassifika. Logħba li ntlagħbet quddiem pubbliku numeruż u li damet ftit aktar minn tliet siegħat. Żebbuġ irnexxielhom iwettqu reazzjoni hekk kif f’mument minnhom Msida kienu 20-15 minn fuq. Iż-żebbuġin irnexxielhom jibqgħu fil-logħba tant li ġabu r-riżultat 20 għal 20, bl-aħħar ġugata tkun determinanti. B’hekk Żebbuġ jinsabu l-ewwel fil-klassifka b’total ta’ 18-il punt, segwieti minn Msida bi 17. Isegwu Għaxaq b’16-il punt u li l- bieraħ kisbu walk over fuq Paola Schreiber 21-0.
Logħba oħra mistennija kienet dik bejn Qormi San Bastjan u Buġibba, żewġ timijiet li għadhom qed jissieltu għar-raba’ post u li jkun ifisser post fil-play offs. Logħba li ġiet mirbuħa minn Qormi SB bl-iskor ta’ 21 għal 9. Grazzi għal din ir-rebħa, Qormi San Bastjan laħqu lil Buġibba fir-raba’ post bi 13-il punt.
F’riżultati oħra:
Marsamxetto kisbu walk over fuq Isla 21-0, Lija għelbu lil Żabbar 21-8 filwaqt li Żurrieq barra minn darhom rebħu lil St Peter’s Żabbar 21 għal 12.
Issa kull team jonqsu żewġ logħbiet qabel imbgħad tibda l-fażi tal-play offs għar-rebħ tal-kampjonat. Play offs li fihom jieħdu sehem l-ewwel erba’ timijiet klassifikati.
Klassifika (1 Diviżjoni)
Żebbuġ 18-il punt
Msida 17-il punt
Għaxaq 16-il punt
Buġibba 13-il punt
Qormi SB 13-il punt
St Peter’s 11-il punt
Żurrieq 9 punti
Lija 8 punti
Marsamxetto 7 punti
Żabbar 7 punti
Isla 0 punti
Paola S. 0 punti
