St Peter’s Żabbar huma ċ-champions tal-kampjonat tal-1 Diviżjoni wara li fil-finali, li ntlagħbet il-Ġimgħa filgħaxija fil-pitch taż-Żejtun, huma għelbu lil Żurrieq bl-iskor ta’ 21-19.
Rebħa li nkurunat staġun mill-aqwa għalihom. St Peter’s Żabbar kienu spiċċaw l-ewwel round tal-kampjonat fl-ewwel post bi 19-il rebħa u għaddew awtomatikament għall-finali għar-rebħ tal-kampjonat.
Min-naħa tagħhom Żurrieq spiċċaw l-ewwel round fit-tielet post u lagħbu play off kontra Żebbuġ biex għaddew għall-finali.
Kienet finali mill-isbaħ, biż-żewġ timijiet ikollhom il-mumenti tagħhom. Logħba li ntlagħbet quddiem pubbliku numeruż.
Bdew tajjeb St Peter’s li f’mument minnhom marru 13-7 minn fuq. Iżda mbgħad rajna r-rimonta ta’ Żurrieq li dawru r-riżultat favur tagħhom u saħansitra marru 16-14 minn fuq.
Il-finali kienet waħda mill-isbaħ u akkanita b’St Peter’s Żabbar jerġgħu iwettqu rimonta u marru mill-ġdid minn fuq 19-16.
Aktar tard il-punteġġ sar 20-18 favur St Peter’s Żabbar. Żurrieq ma qatgħux qalbhom u naqqsu d-distakk għal 20-19.
Iħda finakment kienu St Peter’s Żabbar li għamlu l-punt li kellhom bżonn biex rebħu l-finali u l-kampjonat bi skor ta’ 21-19.
