Hekk kif it-Tlieta filgħaxija kompla l-logħob mill-Kampjonat tal-1 Diviżjoni tal-Boċċi, Għaxaq, Żebbuġ u Msida huma matematikament fil-play offs għar-rebħ tal-kampjonat.
Meta għal tmiem it-tieni round tal-kampjonat fadal tliet logħbiet, jonqos ikun magħruf ir-raba’ team għall-play offs. Il-Birgu jonqoshom punt sabiex jagħmlu dan.
Għaxaq komplew bir-rebħ meta barra minn darhom għelbu lil Birgu 21-18 f’logħba missielta.
Min-naħa tagħhom Żebbuġ, li qed jokkupaw it-tieni post tal-klassifika, tilfu kontra t-team fl-aħħar post tal-klassifika Qormi San Bastjan 21-17.
Msida f’darhom kisbu rebħa sabiħa ta’ 21-6 kontra t-team ta’ Birkirkara.
F’riżultati oħra St Peter’s Żabbar għelbu barra minn darhom lil Buġibba 21-13, Żurrieq għelbu lil Marsamxett 21-12 filwaqt li Lija rebħu lil Birżebbuġa 21-8.
