L-ewwel indikazzjonijiet juru li l-Black Friday ta’ din is-sena kienet waħda ta’ suċċess għan-negozji tant li saħansitra tikkumpara tajjeb ma’ dik tas-sena li għaddiet.
Qalet dan il-Kamra tan-Negozji Żgħar u Medji fi stqarrija hekk kif sostniet li s-settur tal-apparat elettroniku, speċjalment dak tad-djar mar tajjeb ħafna.
Fil-fatt spjegat kif dan in-negozju mill-ewwel indikazzjonijiet qed juri li seta’ mar aħjar minn tas-sena li għaddiet.
Negozju relatat ma’ affarijiet tad-djar ukoll mar tajjeb ħafna, hekk kif l-istess Kamra spjegat li dan seta’ ġara hekk kif aktar nies qed iqattgħu ħinhom ġewwa darhom.
Negozji li jbiegħu l-ħwejjeġ ukoll huma sodisfatti bil-bejgħ ta’ Black Friday ta’ din is-sena minkejja li jidher li ma marrux tajjeb daqs is-sena li għaddiet. Fil-fatt dawk li jbiegħu ħwejjeġ għal kuljum laħqu bejn 50% u 85% tal-bejgħ ta’ Black Friday tas-sena l-oħra.
Il-Kamra tan-Negozji Żgħar u Medji qalet li n-negozju f’dan is-settur mistenni jkompli mur tajjeb f’dawn il-jumejn hekk kif ħafna persuni fi tmiem il-ġimgħa ma jkunux xogħol u b’hekk il-bejgħ mistenni jiżdied.
Ix-xiri ta’ prodotti onlajn żdied ħafna iktar minn snin ta’ qabel. Apparti minn hekk, ħafna negozji kellhom iħaddmu aktar nies sabiex jassiguraw li l-klijenti jimxu mal-protokolli kollha mill-Awtoritajiet.
Il-Kamra nnutat ukoll li ħafna negozji fi Black Friday ta’ din is-sena ser jestendu l-iskontijiet tagħhom sabiex jilħqu l-miri tagħhom. Fil-fatt ħafna mill-iskontijiet m’għalqux fil-jum tal-Ġimgħa iżda se jiġu estiżi sa tmiem il-ġimgħa kollha.
