Fil-Kon-Katidral ta’ San Ġwann saret sejba notevoli, hekk kif fil-Kripta nstab it-tebut tal-Gran Mastru Francisco Ximénez de Tejada.
Dan it-tebut instab waqt li kienu għaddejjin it-tħejjijiet sabiex tkun tista’ ssir id-difna tal-Gran Mastru Fra’ Matthew Festing, il-ġimgħa li għaddiet.
Dan hekk kif waqt li kien qed jitħaffer l-ispazju tal-qabar tal-Gran Mastru Festing, fil-ġenb tal-qabar instab tebut taċ-ċomb li xi darba kien miksi bl-injam.
Dwar dan, ONE News tkellem mal-Kuratur tal-Kon-Katidral ta’ San Ġwann Cynthia de Giorgio, li qalet li minn dejjem kien maħsub li Ximénez, kien midfun hemmhekk, iżda qatt ma kien hemm provi.
Dan hekk kif ma kien hemm ebda lapida jew monument, bħal ma għandu kull Gran Mastru tal-Ordni ta’ San Ġwann.
Hawnhekk ir-riċerka kienet tinkludi tfittxija fil-ktieb tal-mejtin tal-Ordni, fejn hemm madwar tmien mitt Kavallier.
Spjegat, “U hemm miktub jiġifieri handwritten, eżatt ta’ dakinhar fid-9 ta’ Novembru tal-1775, li l-Gran Mastru Francisco Ximénez miet u jgħidlek biex miet. Illi kellu infezzjoni fil-pulmun u kienet milli mid-dehra xi pandemija tal-influwenza.”
Meta staqsejna lil kuratur ir-raġuni għaliex Ximénez tħalla mingħajr lapida, hija semmiet bosta raġunijiet.
Fi żmien Ximenez kien hemm l-irvellijiet tal-Qassisin, immexxija minn Dun Gejtan Mannarino u t-tmexxija qasira tiegħu f’Malta, għamlet lill-Ordni inqas popolari u kien propju f’dan iż-żmien li qabad in-niżla sakemm tkeċċa minn Malta mill-Franċiżi.
Qalet, “Issa Ximénez għal xi raġuni difnuh hawnhekk u qatt m’għamlulu lapida jew monument. Ir-raġunijiet jistgħu jarawh ħafna. L-ewwel nett kien Gran Mastru għal sentejn biss, it-tieni nett huwa sar Gran Mastru wara Pinto u mid-dehra sab il-kaxxi tat-teżor vojta. Kellu jieħu xi deċiżjonijiet ukoll, illi anke spiċċaw bir-rewwixti u anke bagħat in-nies il-ħabs u bil-forka. Jiġifieri ma kienx popolari.”
Cynthia de Giorgio semmiet magħna wkoll kif fil-Kappella ta’ Aragona, il-Lingwa li Ximenez kien jagħmel parti minnha, ma kienx hemm iżjed post biex isir monument.
B’hekk f’din is-sejba fil-Kripta u wara d-dfin tal-Gran Mastru Fra’ Matthew Festing, issa hemm tlettax-il Gran Mastru taħt il-Kon-Katidral.
