Bizrebbugia SP għelbu lill-Għawdxin ta’ Victoria H. bl-iskor minimu ta’ 1-0 bil-goal tant importanti għalihom jasal proprju fil-ħin barrani mis-sostitut Yusuf Abdullahi Sulaiman.
B’hekk huma rebħu l-Amateur Super Cup, biex wara li fil-ġimgħat li għaddew rebħu n-National Amateur League 1 biex kisbu l-promozzjoni għaċ-Challenge League, kisbu d-double u fl-istess waqt ċaħħdu lill-Victoria Hotspurs milli jiksbu t-treble hekk kif huma kienu rebħu n-National Amateur League 2 u l-Amateur Cup proprju l-Ħadd li ghadda.
Kienet finali ferm bilanċjata u tattika, li ħadet il-ħajja fit-tieni taqsima tal-ħin barrani, biż-żewġ timijiet li għalkemm jikkompetu f’diviżjonijiet diversi, huma ftit jew wisq tal-istess livell.
L-ewwel taqsima kienet ferm kwieta, nieqsa minn kull emozzjoni u kkaratterizzata minn ħafna logħob f’nofs il-ground, fejn ma ġiet innutata l-ebda azzjoni perikoluża fuq iż-żewġ naħat.
Kien biss mas-siegħa logħob li waslet l-ewwel azzjoni denja ta’ nota, b’Victoria Hotspurs ikunu huma li joħolqu l-periklu meta Kurt Borg kellu d-daqqa ta’ ras tiegħu minn pożizzjoni angolata mill-viċin tintemm ftit barra.
Bħall-ewwel taqsima, il-partita kompliet tirriżulta bħala waħda ferm tattika, bl-azzjonijiet perikolużi fuq iż-żewġ lasti rispettivi ikunu ineżistenti.
L-iskor sa tmeim il-ħin regolamentari baqa’ ma nbidilx biex b’hekk il-partita kellha tmur għall-ħin barrani.
Birzebbugia skorjaw il-goal tar-rebħa fil-106 minuta meta s-sostitut YUSUF ABDULLAHI SULAIMAN avvanza tajjeb fil-kaxxa u permezz ta’ xutt angulat fil-baxx tefa’ l-ballun fir-rokna tax-xiba, bil-ballun jaħbat ma’ sieq il-wieqfa, biex kompla mal-kullana ta’ goals importnati għat-tim tiegħu matul dan l-istaġun.
L-affarijiet komplew ġejjin ħażin għall-Għawdxin hekk kif proprju żewġ minuti biss wara spiċċaw jilagħbu b’10 players meta tkeċċa għalihom il-player Christian Grima wara daħla kerha fuq player avversarju, b’Gauci li kien ilu fil-ground 17-il minuta biss hekk kif ġie utilizzat bħala sostitut fil-bidu tal-ħin barrani fejn ħa post Daniel Farrugia.
Victoria wieġbu fil-115-il minuta permezz ta’ xutt sabiħ minn tarf il-kaxxa ta’ Ferdinando Apap għadda jħakkek mal-wieqfa, b’Birzebbugia jeħilsuha ħafif
Huma komplew jiddettaw il-logħob u żewġ minuti wara tilfu ċans tad-deheb li jġibu l-sikor indaqs meta Ferdinando Apap niżżel il-ballun bir-ras lejn Kurt Borg
li prova jdur mal-goalkeeper ta’ Birzebbugia Julian Azzopardi, iżda dan tal-aħħar wettaq save mil-isbaħ biex ċaħħad lill-Għawdxin milli jisfurzaw l-għoti tal-penalties.
Lejn l-aħħar mumeti tal-partita proprju ftit qabel it-tisfira finali tar-referee Danilo Francalanza, inqalgħet ftit tenjsoni fil-ground u fl-istands hekk kif l-istess referee ħassar goal għal Victoria Hotspurs mill-veteran Roderick Briffa, minħabba li ġġudika li kien hemm foul fuq il-goalkeeper Azzopardi, fost protesti ferventi mill-players, staff u partitarji tal-Għawdxin.
Birzebbugia komplew jamministraw il-vanatġġ minimu li kellhom sa tmiem il-partita.
Wara l-partita, il-viċi-president tal-MFA Dr Matthew Paris preżenta t-Tazza tar-rebbieħa lill-captain ta’ Birzebbugia, Lee Joe Schembri, fost il-ferħ u l-briju mistħoqq tal-players, staff u partitarji tal-istess tim.
