Wara żewġ telfiet konsekuttivi kontra Floriana u Hamrun Spartans, rebħa kienet imperattiva għal Birkirkara u din waslet mill-Istripes meta b’wirja ta’ karattru għelbu lil Mosta bl-iskor ta’ 2-0, biż-żewġ goals għalihom jaslu proprju fit-tieni taqsima, fejn madankollu li kieku kienu iktar preċiżi fl-attakk u meta wieħed iqis l-azzjonijiet denji ta’ nota li ħolqu fil-partita, l-iskor seta’ saħansitra kien ikbar favurihom.
B’hekk l-Istripes ikkonsolidaw posthom fil-quċċata tal-klassifika tat-Top 6 b’31 punt. Permezz ta’ dan ir-riżultat, Birkirkara, kisbu double fuq Mosta meta fl-Opening Round kienu ħarġu rebbieħa kontra l-Blues bl-iskor ta’ 1-0.
Wara t-telfa ta’ 1-0 kontra Floriana, din kienet it-tieni telfa konsekuttiva għal Mosta.
Kienu Birkirkara li ħolqu l-ewwel periklu wara biss ħames minuti meta xutt ta’ Maicon għadda ftit barra.
Huma komplew fuq l-offensiva u mal-kwarta logħob, kien Maicon li reġa’ mar għall-konklużjoni iżda l-ballun intemm ferm għoli.
Kulma jmur kompla d-dominju tal-Istripes u fl-24 minuta Alex Satariano kellu x-xutt tiegħu jiġi salvat b’diffikultá f’żewġ tenattivi mill-goalkeeper ta’ Mosta, David Udoh Akpan.
Mosta wieġbu għall-ewwel darba fid-29 minuta meta l-captain Zachary Brincat approfitta minn indeċiżjoni ta’ Alessandro Coppola fid-difiża, qabel kellu x-xutt tiegħu minn pożizzjoni ideali jintemm ftit għoli.
Birkirkara reġgħu ħolqu l-periklu fit-33 minuta meta Ignacio Morello wara li rċieva minn cross pinġut ta’ Maicon, minn taħt il-lasta għamel l-impossibli u laqat bi żbrixx il-ballun li finalment intemm barra, bl-azzjoni tisfuma fix-xejn.
Fil-ftuħ tat-tieni taqsima, Birkirkara komplew fejn ħallew fi tmiem l-ewwel waħda u fit-52 minuta fetħu l-iskor meta Mbong għadda tajjeb lejn SHAUN DIMECH li permezz ta’ xutt mill-isbaħ mid-distanza mingħajr ma kkontrolla l-ballun, spara l-ballun fis-saqaf tax-xibka, b’dan ikun l-14-il goal tiegħu fil-Malta Premier fil-karriera tiegħu sa issa.
Il-partita kompliet ikkaratterizzata minn ħafna logħob f’nofs il-ground, dan sat-82 minuta meta Alex Satariano għal Birkirkara b’eleganza u teknika kbira kellu xutt min tarf il-kaxxa li stampa mal-mimduda, b’Mosta jeħilsuha ħafif.
Mosta wieġbu tliet minuti wara meta Agyemang kellu daqqa ta’ ras mill-viċin salvata tajjeb mill-goalkeeper Taljan ta’ Birkirkara, Giacomo Volpe.
Birkirkara issiġillaw ir-rebħa pemezz tat-tieni goal fil-ħin miżjud meta Alex Satariano provda l-assist lis-sostutut ANDREA ZAMMIT li kien ilu biss minuta fil-ground, li min-naħa tiegħu dar tajjeb ma’ tliet avversarji qabel permezz ta’ xutt fil-baxx minn ġol-kaxxa tefa’ ġewwa.
Referee: Slobodan Petrovic
Plejer tal-Logħba: Shaun Dimech (Birkirkara FC)
