Wara r-rebħa kbira ta’ 5-2 nhar it-Tnejn li għadda fil-Malta Premier, f’partita iktar ekwilibrata, Birkirkara reġgħu għelbu lil Balzan bl-iskor ta’ 2-1, din id-darba f’partita valida mill-Meridianbet FA Trophy, biex b’hekk kisbu double fuq il-ġirien tagħhom u post fir-round tas-16 ta’ din il-kompetizzjoni.
Kienet rebħa meritata għall-Karkariżi li ddominaw il-partita għal ħinijiet twal, b’Balzan jonqsu li jwettqu reazzjoni wara li sofrew il-goal, għalkemm fit-tieni taqsima dehru iktar organizzati minn kull lat u fil-fatt ġew ippremjati permezz tal-goal li permezz tiegħu ġabu l-iskor indaqs momentarjament.
Kienu Birkirkara li ħolqu l-ewwel periklu fis-17-il minuta meta Ignacio manuel Morello Moreiro għadda tajjeb lejn Leandro Lautaro Lacunza li min-naħa tiegħu serva lil Paul Mbong li minn taħt il-lasta tefa’ ftit għoli.
Balzan wieġbu fil-25 minuta meta xutt minn tarf il-kaxxa ta’ Dimeji Awosanya għadda ftit barra.
Iżda kienu l-Istripes li fetħu l-iskor fl-34 minuta meta wara li rċieva minn azzjoni ta’ corner mogħti minn Alex Da Paixao Alves, il-ballun spiċċa f’saqajn AGUSTIN SANDONA li permezz ta’ xutt mill-ewwel tefa’ ġewwa.
Fil-ftuħ tat-tieni taqsima, Birkirkara komplew bl-istess ritmu tal-ewwel waħda u fid-49 minuta, Maxuell Maia minn pożizzjoni ideali tefa’ ferm barra.
Iżda Balzan ma rmewx ix-xuagman anzi wettqu reazzjoni tajba u fis-66 minuta rebħu penalty meta l-iskorer tal-ewwel goal ta’ Birkirara Agustin Sandona deher imiss il-ballun b’idu fil-kaxxa.
Mill-11-il metru inkariga ruħu Alexander Ayo Akpan li iżda ra lill-goalkeeper Taljan ta’ Birkirkara Giacomo Volpe jsalva iżda ma żammx biex mir-rebound pront kien JAN BUSUTTIL li tefa’ ġewwa.
Il-pressjoni kienet kollha fuq Birkirkara u fil-71 minuta Alex Da Paixao Alves kellu x-xutt tiegħu mill-viċin jiġi devjat f’corner mill-goalkeeper ta’ Balzan, Dylan Ciappara.
Huma komplew jiddettaw il-logħob u erba’ minuti wara reġgħu marru fil-vantaġġ, liema goal kellu jkun dak tar-rebħa, b’ xutt mill-isbaħ mid-distanza ta’ ALEX SATARIANO li ma ta l-ebda ċans lil Ciappara.
Birkirkara komplew jamministraw il-vantaġġ minimu li kellhom sa tmiem il-partita.
Referee: Ishmael Barbara
