F’logħba pjaċevoli, Birkirkara ħallew għall-aħħar biex jegħlbu lil Mosta bl-iskor minimu ta’ 1-0. Hawnhekk, madankollu, ta’ min ifaħħar l-wirja ta’ Mosta li offrew oppożizzjoni denja lill-Istripes tul id-90 minuta.
Kienu Birkirkara li ħolqu l-ewwel periklu fid-disa’ minuta meta Maxuell Maia approfitta minn indeċiżjoni fid-difiża ta’ Mosta, avvanza tajjeb iżda kellu x-xutt fil-baxx tiegħu salvat minn mal-art mill-goalkeeper ta’ Mosta, David Udoh Akpan.
Huma komplew fuq l-offensiva u żewġ minuti wara corner dirett ta’ Shaun Dimech ġie salvat tajjeb minn Akpan.
Mosta wieġbu fit-12-il minuta meta Leonardo Fernandes xeħet cross fid-direzzjoni ta’ Agyemang li minn taħt il-lasta ra lill-goalkeeper Taljan ta’ Birkirkara, Giacomo Volpe, jsalva f’corner bi bravura.
Fit-22 minuta, konklużjoni ta’ Prince Afriye dejjem għal Mosta reġgħet ħarġet l-aħjar ta’ Volpe, hekk kif reġa’ kien providenzjali għall-Istripes.
Żewġ minuti biss wara reġa’ kien Afriye li kellu x-xutt fil-baxx mid-distanza tiegħu li iżda din id-darba irriżulta bħala fjakk wisq u ġie salvat mingħajr diffikultá minn Volpe.
Fil-ftuħ tat-tieni taqsima kienu Mosta li ħolqu l-ewwel periklu fid-49 minuta meta Afriye serva lil Zaahary Brvaat li iżda minn pożizzjoni ideali spara għoli.
Birkirkara wieġbu fit-62 minuta meta daqqa ta’ ras mill-viċin tat-Taljan Alessandro Coppola intemmet ftit għoli.
Huma komplew jippressaw u seba’ minuti wara Andrea Zammit kellu xutt mid-distanza li ma tkompliex għal ġewwa minn Yikipe.
Kulma jmur kompla d-dominju assolut tal-Istripes u fit-73 minuta wara li rċieva minn freekick ta’ Gaetan, Yikipe kellu d-daqqa ta’ ras tiegħu minn pożizzjoni ideali tintemm ftit barra.
U meta kollox deher destinat li dan il-konfront kellu jintemm fi draw ta’ mingħajr goals, fis-87 minuta, huma skorjaw il-goal tar-rebħa meta wara li rċieva minn corner ta’ Maicon, MAXUELL MAIA għola fuq kulħadd u permezz ta’ daqqa ta’ ras preċiża tefa’ ġewwa, b’dan ikun it-tmien goal tiegħu matul dan l-istaġun.
Mosta kienu għoddhom ġabu l-iskor indaqs fit-93 minuta meta minn freekick ta’ Leanardo Fernandes, pront kien Volpe li dawwar f’corner b’mod spettakolari.
Referee: Ishmael Barbara
Plejer tal-Logħba: Prince Afriye (Mosta FC)
