FL-uniku partita fl-Stadium Nazzjonali f’Ta’ Qali, Birkirkara ġew min wara sabiex għelbu lil Floriana 2 – 1 biex b’hekk komplew jkabbru l-problemi għal dan it-tim.
Floriana fetħu l-aħjar u resqu qrib fl-ewwel ħinijiet l-ewwel permezz ta’ Kemar Reid fis-6 minuta li x-xutt mill-qrib tiegħu ġie mblukkat f’korner mill-GK Giacomo Nava. L-istess Nava 4 minuti wara salva tajjeb xutt ta’ Mattia Veselji.
Birkirkara damu ftit biex daħlu fil-partita u resqu qrib għall-ewwel darba fl-20 minuta meta Paul Mbong dendel ballun mix-xellug li Kevin Tumilieri ndirizza bir-ras għan-nofs imma Enzo Daniel Cabrera naqas li jikkonkludi tajjeb.
Floriana reġgħu heddew fil-25 minuta permezz ta’ Kemar Reid li x-xutt tiegħu għadda jħakkek ma’ sieq il-lasta biex ir-riżultat sat-tmiem l-ewwel taqsima kien dak ta’ 0 – 0.
Birkirkara fetħu fuq l-attakk u Cabrera laqat il-lasta fis-47 minuta b’xutt angolat wara li l-goalkeeper Kitanov imblokka kif seta’ xutt mill-boghod ta’ Zibo li xxellef minn difensur Karkariz. Minuta wara reġa’ kien Kitanov li salva f’corner xutt ta’ Iorio u ftit wara l-istess goalkeeper Furjaniz salva f’korner ieħor xutt mill-bogħod ta’ Cain Attard. Floriana wieġbu fil-50 minuta b’xutt ta’ Reid li l-GK Nava salva kif seta’.
Minuta biss wara Birkirkara sfaw jilgħabu b’10 players meta Kevin Tulimieri ntwera t-tieni karta safra għal foul fuq Mattias Garcia.
B’plejer aktar, Floriana żiedu fl-isforzi tagħhom u fil-65 minuta l-GK Nava salva b’diffikulta’ xutt ta’ Reid.
Fis-70 minuta Floriana fetħu l-iskor meta kross fil-baxx ta’ Lorenzo De Grazia għadda tul il-lasta biex Oualid El Hasni mill-qrib tefa’ l-ballun fix-xibka.
Immedjata kienet ir-reazzjoni Karkariża hekk kif fit-72 minuta minn freekick mogħti minn Alex Alves De Paixao, Kurt Zammit xeħet għoli mill-qrib bir-ras, iżda minuta wara Enzo Daniel Cabrera spara ġmiel ta’ xutt minn pożizzjoni angolata li spiċċa fir-rokna tax-xibka bil-goalkeeper Kitanov megħlub għal kollox.
Minkejja l-vantaġġ numeriku, Floriana ftit li xejn dehru effettivi fit-tentattiv li jerġgħu jiskurjaw, anzi kienu Birkirkara li skurjaw fit-88 minuta meta Alex Alves De Paixao temm azzjoni personali b’xutt minn barra l-kaxxa li xxellef mid-difensur Zachary Cassar u spiċċa fix-xibka.
Kien il-goal li ta r-rebħa u tliet punti lil Birkirkara minkejja li lagħbu kważi taqsima sħiħa b’raġel anqas.
Referee: Fyodor Zammit
Player tal-Loghba: Kemar Reid
