F’partita li pproduċiet xejn inqas minn ħames goals, Birkirkara, għelbu lil Pietá Hotspurs bl-iskor ta’ 3-2, biex b’hekk l-Istripes aċċertaw ruħhom minn post fil-UEFA Europa League u t-tieni post fil-kampjonat.
Dan filwaqt l Pietá jibqgħu jittamaw li jevitaw ir-relegazzjoni għaċ-Challenge League meta fadlilhom partita oħra kontra Sirens, waqt li jittamaw li llum Santa Lucia u Zebbug Rangers ma jiksbux il-punti.
Kienu Birkirkara li ħarġu fuq l-offensiva u wara biss tliet minuti, Enzo Daniel Cabrera, kellu d-daqqa ta’ ras tiegħu li ntemmet ftit barra.
Pietá wieġbu fit-12-il minuta meta Ojo Temitope ttanta xortih permezz ta’ xutt minn barra l-kaxxa li stampa mal-wieqfa, bl-Istripes jeħilsuha ħafif.
L-Istripes fetħu l-iskor fil- meta Osvaldo Iorio xeħet cross-shot għan-nofs bil-goalkeeper ta’ Pieta Reeves Cini jippanċja bi ftit il-ballun li ntemm għand YANNICK YANKAM li permezz ta’ daqqa ta’ ras mill-viċin tefa’ ġewwa.
Pietá reġgħu ħolqu l-periklu fid-29 minuta meta Kian Leonardi kellu xutt insidjuż li għadda għoli.
Dan sabiex proprju ftit sekondi wara, Daniel Zerafa, dejjem għal Pietá, kellu tentattiv ieħor li għadda barra
Huma komplew fuq l-offensiva u fil-31 minuta, freekick mid-distanza ta’ Samuel Okoh kważi ħasad għal kollox lill-goalkeeer ta’ Birkirkara, Amara Sylla, li dawwar f’corner b’diffikultá.
Birkirkara wieġbu fit-43 minuta meta xutt ta’ Paul Mbong minn ġol-kaxxa stampa ma’ sieq il-wieqfa.
Huma rduppjaw l-iskor fil-ħin miżjud tal-ewwel taqsima meta Cabrera kellu tentattiv minn taħt il-lasta li stampa mal-mimduda, biex mir-rebound ALESSANDRO IORIO tefa’ l-ballun f’lasta vojta.
Fit-48 minuta Birkirkara appellaw għall-penalty meta l-goalkeeper żagħżugħ ta’ Pietá Hotspurs, Reeves Cini, allegatament deher iwaqqa’ lil Paul Mbong fil-kaxxa iżda r-referee Slobodan Petrovic, ħalla l-logħob għaddej.
Pietá naqqsu l-marġni tal-iskor fl-64 minuta, meta wara azzjoni konfuża fil-kaxxa, CLINTON BANGURA, wara li kellu żewg tenattivi jaħbtu mal-lasta, mat-tielet wieħed, minn taħt il-lasta tefa’ ġewwa.
Fil-75 minuta, Birkirkara ssiġillaw ir-rebħa permezz tat-tieleit goal meta s-sostitut ALEX DA PAIXAO ALVES li kien ilu fil-ground biss minuta u nofs, dar tajjeb ma’ difensur avversarju u b’eleganza tefa’ l-ballun fir-rokna tax-xibka.
Pietá reġgħu sabu x-xibka fit-92 minuta, meta wara azzjoni ta’ corner, Osvaldo Iorio, tefa’ l-ballun fil-lasta tiegħu stess, biex b’hekk irriżulta auto-goal sfortunat.
Referee: Slobodan Petrovic
Player tal-Logħba: Yannick Yankam (Birkirkara)
