BIR-RITRATTI: Taljan arrestat wara sejba ta’ 54kg droga – b’valur fit-triq ta’ €880,000

Ġranet ta’ investigazzjonijiet intensivi mill-Pulizija wasslu għal sejba ta’ madwar 54kg droga suspettata kannabis, b’valur fit-triq ta’ madwar €880,000.  

Id-droga nstabet wara li lbieraħ ġiet iċċirkondata residenza f’San Pawl il-Baħar u saret tfittxija. 

B’rabta ma’ din is-sejba, il-Pulizija arrestat Taljan ta’ 48 sena.  

Huwa qed jinżamm fil-lockup tal-Pulizija fil-Kwartieri Ġenerali, il-Floriana, filwaqt li mistenni jitressaq il-Qorti llum għall-ħabta tan-nofsiegħa ta’ waranofsinhar quddiem il-Maġistrat tal-Għassa Gianella Camilleri Busuttil.