Illum hija l-ġurnata li fiha nfakkru Jum l-omm, minkejja li hija ċelebrazzjoni ta’ mħabba s-sinifikat ta’ din il-ġurnata huwa differenti għal kull persuna.
Għal xi wħud Jum l-omm hija memorja sabiħa ta’ mħabba u rispett hekk kif illum sfortunatament ommhom m’għadiex magħhom, oħrajn jiċċelebraw Jum l-omm b’xi ikla filwaqt li oħrajn qed jiċċelebraw dan il-jum għall-ewwel darba hekk kif kellhom tarbija din is-sena.
Iżda l-omm li kellimna aħna, saret omm l-Erbgħa, ftit wara d-disgħa ta’ filgħodu. Stqarret magħna li ċ-ċkejkna Stella bidlitilha Jum l-Omm, f’ġurnata mill-isbaħ.
Din l-omm hija Ramona Attard, li kien biss ftit tal-jiem ilu li saret omm ta’ ċkejkna. Stqarret magħna li għaliha jum l-omm issa jfisser li toqgħod fid-dar tagħha u tapprezza l-“ġojjel” li għoġbu jibatilha Alla.
“Naf x’jiġifieri li ma tkunx ħerqana għal jum l-omm, meta tibda titlob li jibda jgħaddi għax għalik ifisser memorji koroh.”
Kien għalhekk, li f’din il-ġurnata Ramona kellha appell importanti.
“L-appell tiegħi f’jum l-omm hu li nikkunsidraw li mhux kulħadd jaffaċja okkażjonijiet bħal dawn l-istess u m’għandna nisfurżaw lil ħadd jattendi għal ċelebrazzjonijiet jekk ma jkollux aptit għax wara kull persuna hemm storja differenti.”
Illum li Ramona Attard saret omm, se tkun qed tgawdi Jum l-omm għall-ewwel darba flimkien mat-tarbija tagħha, Stella, li llum bidlitilha mhux biss il-mod ta’ kif tiċċelebra din il-ġurnata iżda ħajjitha kollha.
