Ġiet inawgurat il-binja ‘Bl-Oħla Dawl Libbist’, li se tospita l-Uffiċċju tal-Kummissarju għall-Organizzazzjonijiet Volontarji (OCVO) f’Blata l-Bajda.
F’konformità mal-wegħda elettorali, illum l-OCVO mhuwiex sempliċiment uffiċċju regolatorju. Biex dan l-uffiċċju jissalvagwardja u jagħti s-setgħa lis-settur saret riforma li wasslet biex dan l-uffiċċju llum huwa organizzazzjoni li joffri servizzi aktar wiesgħa għas-settur filwaqt li jżomm ir-rwol regolatorju tiegħu.
“Il-missjoni aħħarija tal-Uffiċċju tal-Kummissarju għall-Organizzazzjonijiet Volontarji hija li jissalvagwardja u jsaħħaħ is-Settur tal-Volontarjat bħala pilastru ewlieni fis-soċjetà u l-ekonomija.”
Minsitru għall-Inklużjoni, Volontarjat u Drittijiet tal-Konsumatur Julia Farrugia Portelli
L-Uffiċċju tal-Kummissarju huwa wkoll responsabbli li jkun sieħeb soċjo-ekonomiku sabiex ikun jista’ jwassal benefiċċji soċjali, ċivili u komunitarji. Dan isir billi tingħata aktar viżibilità lis-settur tal-volontarjat kif ukoll billi tkun garantita t-trasparenza u l-kontabilità tal-organizzazzjonijiet volontarji fit-twettiq tax-xogħol importanti tagħhom.
Bħala l-korp regolatorju ewlieni tas-settur, l-OCVO jagħmel monitoraġġ u jissorvelja l-attivitajiet tal-NGOs, filwaqt li jsaħħaħ u jipproteġi l-funzjoni tal-volontarjat. Dan iwassal għall-kisba tal-ġid aħħari akbar u komuni.
Waqt il-proċess ta’ ristrutturar ta’ dan l-uffiċċju, ġew imwaqqfa direttorati ġodda, funzjonijiet u proċessi ġodda li ħa jżommu l-organizzazzjonijiet volontarji fiċ-ċentru tal-ħidma tagħhom. Għaldaqstant, bħala parti minn din ir-riforma, il-ħaddiema fl-OCVO se jibbenefikaw minn numru ta’ inċentivi, fosthom żieda fil-pagi u rwoli aktar definiti b’nomenklaturi li jaqblu mal-mod ta’ ħidma tagħhom.
Il-Ministru Farrugia Portelli rrimarkat li fil-kuntest tar-riforma li saret f’dan l-uffiċċju, kompla t-tisħiħ tan-nisa fuq il-post tax-xogħol. Aktar minn nofs il-ħaddiema li għandhom grad maniġerjali f’dan l-uffiċċju huma nisa. L-uffiċċju għandu wkoll miżuri ta’ appoġġ għall-ħaddiema kollha biex dawn ikunu jistgħu jilħqu bilanċ bejn il-ħajja u x-xogħol.
