Fil-konfront tant mistenni ta’ tmiem il-ġimgħa bejn Hamrun Spartans u Floriana rriżulta bilanċ assolut hekk kif dawn iż-żewġ timijiet temmew il-konfront ta’ bejniethom fi draw ġust ta’ 1-1.
Ta’ nota huwa l-fatt li Hamrun lagħbu għal iktar minn nofsiegħa sħiħa bi player iktar iżda naqsu milli jwettqu reazzjoni grintuża.
Hamrun kellhom lill-captain Steve Borg nieqes minħabba li għadu qed jirkupra minn injary, biex assuma r-responsabbiltajiet ta’ captain, il-goalkeeper internazzjonali, Henry Bonello.
Floriana għamlu l-intenzjonijiet tagħhom ċari mal-ftuħ tal-partita u fetħu l-iskor wara biss tliet minuti meta Matia Veselji għadda tajjeb lejn Jake Grech li min-naħa tiegħu provda l-ballun fuq platt tal-fidda lil DUNSTAN VELLA li permezz ta’ xutt fil-baxx tefa’ l-ballun fir-rokna tax-xibka.
Hamrun wieġbu fil-11-il minuta u kellhom ferħa bla temma meta ghalkemm iż-żagħżugħ Sven Xerri tefa’ l-ballun fix-xibka, ir-referee Alex Johnson innota foul fl-attakk ta’ player ta’ Hamrun fuq il-goalkeeper ta’ Floriana, Christoffer Mafoumbi.
Huma komplew fuq l-offensiva u żewġ minuti biss wara Talison kellu l-konklużjoni fil-baxx tiegħu tintemm ftit barra.
Kulma jmur kompla d-dominju tal-Ispartans u fit-23 minuta rebħu penelty meta Mafoumbi ħareġ barra minn psstu u waqqa’ lil Joseph Mbong fil-kaxxa. Mill-11-il metru, inkariga ruħu l-iskorer prolifiku LUKE MONTEBELLO li permezz ta’ xutt fil-baxx għar-rokna tax-xibka tefa’ l-ballun naħa u lil Mafoumbi n-naħa opposta.
Il-Greens irrisipondew man-nofsiegħa logħob meta Fernandinho kellu x-xutt tiegħu minn pożizzjoni ideali jiġi mdawwar f’corner minn Henry Bonello, li deher li weġġa’ xi ftit f’din l-azzjoni.
Fil-ftuħ tat-tieni taqsima, Hamrun ħarġu ferm aggressivi u fis-47 minuta Raphael Lopes Silva kellu konklużjoni mid-distanza u kemmxejn fraġli tintemm ftit barra.
Dan sabiex fl-54 minuta Floriana qalgħu daqqa ta’ ħarta meta spiċċaw jilagħbu b’10 players wara li tkeċċa ż-żagħżugħ Mattia Veselji meta ntwera żewġ karti sofor fil-partita.
Hamrun reġgħu ħolqu l-periklu fl-74 minuta meta Ryan Camenzuli ttanta xortih permezz ta’ xutt mid-distanza li iżda ntemm għoli.
Mad-90 minuta, Hamrun, tilfu ċans tad-deheb li jiskorjaw il-goal tar-rebħa meta Joseph Mbong għadda tajjeb lejn il-Kroat Roko Prsa li iżda kellu l-konklużjoni erratika tiegħu tintemm ftit barra.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Alex Johnson
Plejer tal-Logħba: Dunstan Vella (Floriana)
