“Bil-ħatriet ta’ Kummissarju tal-Istandards u ta’ Ombudsman komplejna nsaħħu l-istituzzjonijiet.”
Qal dan il-Prim Ministru Robert Abela waqt li kienet qed tiġi diskussa l-mozzjoni dwar il-ħatra tal-Ombudsman, it-Tnejn filgħaxija fil-Parlament.
Plenarja li fiha rat żewġ voti li wasslu għall-ħatra tal-Prim Imħallef Emeritu Joe Azzopardi bħala Kummissarju għall-Istandards fil-Ħajja Pubblika b’ 41 vot favur u 33 kontra, u l-ħatra tal-Imħallef Emeritu Joseph Zammit McKeon bħala Ombudsman. Il-vot għal din l-aħħar kariga kien wieħed unanimu.
Dwar il-mozzjonijiet tal-kariga ta’ Kummissarju għall-Istandards fil-Ħajja Pubblika u dik tal-Ombudsman, il-Prim Ministru tenna li l-Gvern ressaq dawn il-mozzjonijiet biex primarjament dawn jimtlew u b’hekk ikomplu jissaħħu l-istituzzjonijiet.
Dr Abela sostna wkoll ix-xogħol kbir li sar biex tressqu dawn l-ismijiet, biex umbagħad il-Kap tal-Oppożizzjoni, Bernard Grech mar lura minn kelmtu.
“Kien proċess ta’ ħafna u ħafna xhur ta’ diskussjonijiet, diversi ismijiet li ġew esplorati, diversi umbagħad fl-aħħar meta qbilna dwar l-Imħallef Zammit McKeon bħala Ombudsman u l-Prim Imħallef Emeritu Joe Azzopardi bħala Kummissarju għall-Ħarsien tal-Istandards qbilna qbil issiġillat umbagħad ikollok il-Kap tal-Oppożizzjoni li fl-aħħar sekonda jirtira lura u jgħidlek iva imma f’irwoli inversi.”
Dr Abela rrimarka wkoll it-ton dispreġġjattiv li adottat l-Oppożizzjoni fid-diskussjoni dwar il-Kummisarju għall-Istandards fil-Ħajja Pubblika.
Dwar il-mozzjoni li rrigwardjat il-ħatra ta’ Ombudsman, il-Prim Ministru Robert Abela, tenna r-rekwiżiti essenzjali li għandu Joseph Zammit McKeon għal din il-kariga fosthom l-esperjenza u t-tħaddim tajjeb tal-liġi, iżda mhux biss.
“L-Imħallef Zammit McKeon huwa magħruf kemm kien jagħti volum ta’ sentenzi jiġifieri dam imħallef 12-il sena, 4,212-il ġurnata u ta medja ta’ sentenza kull jumejn.”
Fil-fatt, hawn il-Prim Ministru f’parentesi li għamel tenna l-bżonn tal-ispeditezza biex jitressqu n-nies il-Qorti f’każijiet li trattaw inċidenti serji li wasslu għal mewt ta’ persuni.
Dan b’referenza għall-każ ta’ Jean Paul Sofia hekk kif sostna li mhux aċċettabbli li aktar minn 3 xhur wara li seħħ l-inċident, għadu ma tressaq ħadd il-Qorti.
“Għandhom iħarsu b’mod partikolari lejn din l-istatistika membri tal-ġudikatura li f’Inkjesti Maġisterjali partikolarment meta jitrattaw inċidenti serji li wasslu għall-mewt, illum aktar minn 3 xhur wara u with no end in sight, illum għad ma hemmx proċess verbal li huwa magħluq u sa llum il-ġurnata għad ma hemm ħadd li tressaq il-Qorti. Dan mhuwiex aċċettabbli.”
Intant, il-Prim Ministru rrimarka l-ipokrezija tal-Oppożizzjoni b’rabta mal-istituzzjonijiet. Dan b’differenza għall-Gvern li dejjem irrispetta d-deċiżjonijiet tal-istuzzjonijiet filwaqt li saħħaħhom b’riforma kbira wara oħra.
“Il-Prim Ministru ta’ dak iż-żmien Eddie Fenech Adami li ġo din il-kamra fil-Parlament l-ieħor naturalment, bil-privileġġ u l-immunitá parlamentari taf x’qallu lill-Ombudsman Joe Sammut, li tilef kull sens ta’ fairness, qallu li qed jibgħat messaġġ li huwa arroganti u qalli li qed jibgħat messaġġ politiku. Mur ġibu kieku llum il-Gvern jibgħat din ix-xorta ta’ messaġġ fuq xi ħadd mill-istituzzjonijiet.”
Il-Prim Ministru rringrazzja lill-Ombudsman uxxenti Anthony Mifsud tas-snin tiegħu ta’ ħidma f’din il-kariga. Dr Abela temm jawgura liż-żewġ persuni li se jkunu qed jimlew dawn il-kariga.
“Għalhekk dan ir-rispett aħna se nibqgħu nżommuh. Hekk dejjem għamilna u hekk se nibqgħu nagħmlu aktar minn qatt qabel.”
