Kelb, żewġt iżwiemel u pony ħelsuha minn ħalq il-mewt bis-saħħa ta’ intervent f’waqtu minn ħaddiema tal-Protezzjoni Ċivili u l-Pulizija wara nirien li ħakmu razzett tal-bhejjem fis-Siġġiewi.
In-nirien tkebbsu għall-ħabta tad-09:15 tal-Erbgħa filgħodu, u kienu l-ġirien li joqogħdu fl-inħawi li rrappurtaw dawn in-nirien. Sorsi qrib l-investigazzjonijiet qalu li n-nirien bdew minn kamra fir-razzett li m’għandhiex sistema tal-elettriku u li kienet tintuża bħala maħżen tal-injam.
Xhieda fuq il-post qalu lil ONE News li kienet azzjoni immedjata tal-membri tal-Protezzjoni Ċivili flimkien mal-Pulizija tar-Rapid Intervention Unit li wasslet sabiex inħareġ kelb u pony li kienu fil-periklu li jinħarqu. Madankollu jidher li l-annimali belgħu ammont ta’ duħħan.
F’tebqa’ t’għajn bdiet ħidma sabiex jiġi assigurat li ż-żewġt iżwiemel l-oħra li kienu f’parti oħra tar-razzett ma jispiċċawx fil-periklu.
Tul l-operazzjoni spikkat l-imħabba u d-dedikazzjoni tal-membri tal-Forzi tal-Ordni li dehru jwensu kelb x’aktarx imnissel mir-razza Pitbull li deher maħsud b’dak li kien għaddej.
L-ewwel li ma daħlu fuq il-post kienu l-Pulizija tar-Rapid Intervention Unit, madankollu kellhom joħorġu ’l barra minħabba l-periklu enormi tad-dħanen fuq il-post.
Il-membri tal-Protezzjoni Ċivili bl-ilbies protettiv dehru jidħlu warajhom u bdew b’ħidma intensiva biex in-nirien ġew ikkontrollati fi ftit ħin.
L-investigazzjonijiet b’rabta ma’ dan il-każ qed jitmexxew mill-Pulizija tat-tieni distrett. Dwar il-każ infetħet inkjesta maġisterjali mmexija mill-Maġistrat Monica Vella li ħatret diversi esperti sabiex jassistuha.
