Il-Prim Ministru Joseph Muscat jinsab Brussell għas-Summit Ewropew. Fil-kummenti tiegħu lill-ġurnalisti, l-Prim Ministru spjega li matul din il-laqgħa se jkunu qed jiġu diskussi s-sitwazzjoni fis-Sirja, l-kummerċ u l-iżviluppi dwar BREXIT kif ukoll l-imigrazzjoni fost oħrajn.
Il-Prim Ministru fisser li huwa importanti li matul il-laqgħa tal-Kunsill Ewropew jiġi diskuss l-iżvilupp tal-kriżi umanitarja fis-Sirja. Fil-kummenti tiegħu l-Prim Ministru stqarr li diskussjoni importanti oħra hija dik tal-qasam kummerċjali u BREXIT, hekk kif din hija l-ewwel okkażjoni tal-Prim Ministru Ingliża Therese May flimkien mal-mexxejja Ewropej biex tgħaddi l-ħsibijiet tagħha dwar il-ħruġ tar-Renju Unit mill-Unjoni Ewropea.Il-Prim Ministru spjega li matul din il-laqgħa mhux se jibdew in-negozjati ta’ ħruġ għaliex ma saret l-ebda notifika.
Fuq l-aġenda ta’ din il-laqgħa insibu wkoll l-imigrazzjoni, li fi kliem il-Prim Ministru l-qasma bejn il-pajjiżi Ewropej fuq dan is-suġġett hija akbar minn qatt qabel u li jemmen li din id-diskussjoni mhux se tkun qed twassal għal soluzzjoni Ewropea, iżda huwa pożittiv li pajjiżna se jibqa’ għaddej kif inhu f’dik li hija imigrazzjoni hekk kif il-pajjiż sab għajnuna individwali. Il-Prim Ministru fi Brussell aċċenna għal bżonn ta’ soluzzjoni Ewropea, u li l-mexxejja Ewropej se jkunu qed ikomplu jagħmlu pressjoni biex tinstab is-soluzzjoni.
