Fadal biss jum biex proprju s-Sibt filgħaxija jittella’ wieħed mill-aktar kunċerti tant mistenni, dak ta’ Joseph Calleja flimkien mal-kantawtur Taljan Andrea Bocelli. Kunċert, li sal-bieraħ stess parteċipanti kienu jinsabu għaddejjin bil-provi biex is-Sibt jittella’ ħarir.
Dan il-kunċert se jkun qed jiċċelebra l-20 Anniversarju tat-tenur Malti Joseph Calleja minn meta beda l-karriera tiegħu fl-opera quddiem il-pubbliku
Il-kunċert se jkun qed isir is-Sibt fuq il-Fosos tal-Furjana bil-parteċipazzjoni tal-Malta Philharmonic Orchestra u il-BOV Joseph Calleja Children’s Choir taħt id-direzzjoni ta’ Gillian Zammit.
Proprju lbieraħ filgħaxija, it-tenur Malti Joseph Callejja tella’ biċċa filmat qasir fuq il-paġna tiegħu tal-Facebook biex jagħti togħma żgħira ta’ x’se jkun qed joffri dan il-kunċert meraviljuż.
Ftit tal-jiem ilu Andrea Bocelli kellu jikkanċella żewġ kunċerti għax kellu każ serju ta’ bronkite, fejn fuq il-paġna tiegħu kien ġie sostnut li għalkemm ma kellu l-ebda xewqa li jikkanċella żewġ kunċerti, ma kienx f’saħħa tajba u għalekk kellu bżonn ftit jiem ta’ mistrieħ.
