“Deċiż u determinat.”
Hekk iddeskriva l-prestazzjoni tiegħu, il-Kap Nazzjonalista Bernard Grech quddiem l-iżviluppi xokkanti fil-Partit Nazzjonalista fl-aħħar jiem u li komplew jixħtu dawl fuq il-firda kbira li għadha tiddomina fil-Partit Nazzjonalista.
Grech tkellem fuq id-deċiżjonijiet li qal li jieħu, waqt intervista l-Ħadd filgħodu meta kien mistoqsi dwar il-battibekk bejn Jason Azzopardi u Adrian Delia li wassal għal stqarrija konġunta bejn iż-żewġ deputati.
Stqarrija fejn fiha Jason Azzopardi rtira l-allegazzjonijiet kbar li kien għamel fuq l-eks Kap Nazzjonalista.
Meta kien mistoqsi: “Illum li għaddew ftit ġranet minn dak li ġara din il-ġimgħa xi spjegazzjoni tagħti?”
Bernard Grech wieġeb: “Le żgur li jien kont determinat u għadni determinat li ma nħallix iktar ħmerijiet isiru. Fil-fatt din il-ġimgħa stess urejt li jiena kont determinat.”
Grech qal dan minkejja li sejjaħ laqgħa tal-Eżekuttiv sabiex skontu jieħu l-passi kontra Delia u Azzopardi: “Dakinhar jien kont deċiż u determinat li jien mmur quddiem l-Eżekuttiv u anke nieħu l-passi neċessarji kontra l-persuni li jidhirli jiena li kienu naqsu.”
Madankollu lanqas għaddew ftit sekondi li Bernard Grech minkejja d-determinazzjoni li qal li kellu, ammetta li ma marx għal-laqgħa tal-Eżekuttiv għaliex ċeda liż-żewġ deputati.
Hu stqarr: “Ġie ppreżentat lili ftehim li allura kien hemm żewġ protagonisti prinċipali li qablu bejniethom fuq dikjarazzjoni u jien ħassejt li f’dak il-mument kien ikun aktar opportun li nagħti piż lil dak il-ftehim milli r-rieda li nibqa’ għaddej kif jiena kont determinat li nibqa’ għaddej.”
Kien hawn li l-maskra ta’ fiduċja li pprova jilbes Grech sabiex jaħbi d-dgħjufija tiegħu, waqgħet.
Dan hekk kif donnu ammetta li żbalja li ma pproċediex bil-laqgħa tal-eżekuttiv kif pjanat.
Grech sostna: “Jista’ jkun li s-sitwazzjoni kienet tkun aħjar li kieku bqajt għaddej.”
Intant Bernard Grech tkellem dwar l-aħħar stħarriġ li ħareġ fil-gazzetta MaltaToday.
Huwa waħħal fl-iżviluppi ta’ din il-ġimgħa: “L-episodju li ġara din il-ġimgħa hekk f’nofs waqt li qed isir survey żgur li jagħmel ħsara lill-Partit.”
Madankollu konvenjentament il-Kap naqas milli jinnota li l-iżviluppi li seħħew fil-Partit Nazzjonalista, ġraw fil-mument li l-istħarriġ kien qed jiġi konkluż u b’hekk dawk li pparteċipaw ma setgħux jwieżnu l-aħħar żviluppi fid-deċiżjoni tagħhom lil min jivvutaw.
Rimarka li saħansitra għamlet il-MaltaToday innifisha.
“The impact of the Jason Azzopardi-Adrian Delia social media spat may not have been fully captured by this survey,” tgħid il-MaltaToday fl-analiżi tal-istħarriġ tagħha.
Minkejja dan kollu, Bernard Grech kompla fejn ħalla qabel, jiġifieri moħħu fl-elezzjonijiet u jgħid li hu jista’ jkun Prim Ministru.
Hu saħaq: “Jiena għada nista’ nkun fil-Gvern.”
