F’għodwa li fiha Bernard Grech sejjaħ lill-midja sabiex isegwu intervista mxandra b’mod dirett fuq ir-radju tal-Partit Nazzjonalista, spikka s-skiet li jtarrax minn Bernard Grech dwar l-iskandlu ta’ Jason Azzopardi. Jumejn wara li ġie żvelat li Jason Azzopardi ma ddikjarax dħul għall-ħlas tat-taxxa, Bernard Grech mhux talli ma ħa l-ebda azzjoni fil-konfront tiegħu iżda ta biss kumment mal-portal tal-knisja biex jiddefendi lil Azzopardi.
ONE News sebaħ is-Sibt filgħodu biswit id-Dar Ċentrali biex jagħmillu l-mistoqsijiet dwar x’ser ikun qed jagħmel bid-deputat Nazzjonalista Jason Azzopardi. Madankollu, Bernard Grech bħal donnu fettillu jilgħab noli mal-ġurnalisti u bl-għajnuna tax-xufier tiegħu għamel użu mit-tliet entraturi differenti tal-binja tal-Media.link u tad-Dar Ċentrali biex jiskappa mill-crew ta’ ONE News.
Dan erbat ijiem wara li l-Kap Nazzjonalista Bernard Grech daħal jiġri f’lift sabiex jaħrab mill-mistoqsijiet tal-ġurnalisti. It-Tlieta Bernard Grech sejjaħ l-istampa għal żjara li għamel f’uffiċini ta’ kumpanija iżda ma’ tmiem iż-żjara huwa ħarab mill-mistoqsijiet u daħal jiġri fil-lift. Hekk kif ġurnalisti li kienu għadhom lanqas għamlu l-mistoqsija tagħhom komplew jisħqu li jingħataw din l-opportunità wara li sejħilhom hu stess, minn wara l-kelliem tiegħu Alessandro Farrugia beda jgerger kontra l-ġurnalisti għax qed iżommulu l-lift.
Intant, imkejjen fid-Dar Ċentrali qalulna kif is-skiet ta’ Bernard Grech wara l-fatti żvelati dwar id-deputat Nazzjonalista Jason Azzopardi qajmu dubji serji dwar kemm Grech ser ikun qed jaġixxi biex Azzopardi jerfa’ r-responsabbilità. Dan hekk kif innutaw li minħabba li Grech għamel snin ma jħallasx eluf ta’ ewro f’taxxa, issa għandu idu marbuta u għalhekk ser jogħtor quddiem Jason Azzopardi. Dan filwaqt li saħqu ma’ ONE News kif il-biża’ evidenti li Grech għandu mill-mistoqsijiet pertinenti tal-ġurnalisti qed tkompli titfa’ dubju dwar kemm verament huwa l-Kap sod li darba wara oħra qed jgħid li hu.
Ara wkoll:
https://www.one.com.mt/2021/03/06/il-kummissarju-ghall-istandards-fil-hajja-pubblika-mitlub-jinvestiga-lil-jason-azzopardi/
