Id-Deputati tal-Partit Nazzjonalista, issa mhux qed jaqblu mal-Kap Bernard Grech dwar ir-riformi li qed isiru f’pajjiżna, fosthom dik fil-liġi dwar il-kirjiet ta’ qabel l-1995.
Dan ħareġ biċ-ċar waqt dibattitu fuq l-akkomodazzjoni soċjali fil-programm Insights, il-Ġimgħa filgħaxija.
Fil-fatt, id-Deputat Ivan Bartolo farfar dikjarazzjoni li għamel il-Kap Bernard Grech waqt l-istadju ta’ konsultazzjoni tar-riforma dwar din il-liġi meta qal li bil-liġi l-ġdida 40,000 persuna se jispiċċaw mingħajr saqaf fuq rashom.
Mistoqsi dwar din id-dikjarazzjoni Ivan Bartolo qal li din ma kinitx idea tiegħu.
Bartolo qal, “Jiena hekk qed nimmaġina. Issa nitolbok issaqsi lil min qalha għaliex ma kinitx l-idea tiegħi.”
Viżibbilment skomdu, Bartolo saħansitra qal li huwa qatt ma qal din iċ-ċifra: “Jiena qatt ma għidt din iċ-ċifra.”
Madankollu ftit wara nduna li għaxxaqha u rema lill-Kap tiegħu stess, imbagħad ipprova jġaħġaħha favurih.
Hawnhekk id-deputat Nazzjonalista qal, “Il-Kap tal-Oppożizzjoni ma qal xejn ta’ barra minn hawnhekk.”
Tul il-programm li fih ġiet diskussa l-liġi li fi ftit jiem se tkun qed tidħol fis-seħħ, il-Ministru għall-Akkomodazzjoni Soċjali, Roderick Galdes fakkar kif fl-2007, il-Partit Nazzjonalista alloka appartamenti lin-nies minkejja li ma kienx hemm permessi għalihom u qatt ma nbnew.
Il-Ministru Galdes sostna: “Jiena ma nagħmilx bħalma għamel Gvern tiegħu fit-2007 fejn allokajtu nies, wegħedtuhom li ħa ttuhom flat fuq postijiet li lanqas permessi ma kien hemm u qatt ma nbnew dawn. Qegħdin hawnhekk ara dawn.”
Fakkar ukoll kif il-poplu, mit-taxxi tiegħu, kellu jagħmel tajjeb għall-konkrit difettuż f’postijiet bħal dik ta’ Binja Buqana.
Il-Ministru Galdes tenna: “Kellna noħorġu mit-taxxi tal-poplu €4 miljun biex insewwu l-problema li writna f’postijiet, li kienu biegħuhom dawn, jiġifieri dawn daħku bin-nies. Biegħulhom postijiet bil-konkrit difettuż, kullimkien. Ħaż-Żebbuġ, għandna Binja Buqana, għandna Binja Qlejgħa, kien hemm Binja Santa Luċija fl-Imtarfa.”
Quddiem dawn il-fatti, Ivan Bartolo ma’ għamel xejn ħlief ammetta li l-postijiet difettużi bniehom Gvern Nazzjonalista.
Il-Ministru Galdes stqarr: “Dan Gvern Nazzjonalista kien hemm.”
Bartolo tenna: “Bnieh Gvern Nazzjonalista.”
Min-naħa tiegħu l-Ministru Galdes saħaq: “Gvern Nazzjonalista bnieh u alla jbierek il-konkrit ma kienx tajjeb għall-bankini.”
Intant mistoqsi dwar il-proposti tal-Partit Nazzjonalista dwar dan il-qasam, Ivan Bartolo qal li l-Partit Nazzjonalista, għandu l-proposti iswed fuq l-abjad.
Huwa qal, “Aħna mhux biss għaddejjin bid-diskussjonijiet imma għandna black on white il-proposti tagħna.”
Madankollu mistoqsi dwar dawn il-proposti, Bartolo temm jirrikorri għar-rettorika tal-Kap tiegħu Bernard Grech u spiċċa ma ħareġ b’xejn.
Bartolo qal, “Mhux se nkun jien il-prużuntuż li niġi hawnhekk fil-programm tiegħek inħabbar dak li l-Gvern Nazzjonalista għandu għall-qasam soċjali.”
