It-triju Taljan Il Volo għandu l-għatx biex jaħdem ma’ Michela Pace.
Hekk stqarrew f’konferenza tal-aħbarijiet fl-ambaxxata Taljana meta ġew mistoqsija ma’ liema artist Malti jixtiequ jaħdmu fil-futur qrib.
“Smajna b’Michela meta rajniha tkanta fil-Eurovision Song Contest, nafu li rebħet X Factor u hija artista fenomenali u jkun ta’ pjaċir għalina li naħdmu magħha”, qalu l-grupp li llejla se jippreżentaw it-tielet kunċert tagħhom f’pajjiżna.
Il Volo qed jiċċelebraw l-għaxar anniversarju tagħhom billi qed iduru diversi pajjiżi wara li ħarġu l-album l-ġdid tagħhom ‘Musica’.
Il Volo jibqgħu popolari għal mod kif żewġu l-mużika opera, klassika u dik aktar kurrenti flimkien. Huma intlaqgħu ferm tajjeb f’pajjiżna fejn saħqu li gżiritna dejjem hija l-post li jkunu jridu jirritornaw fiha.
Il Volo huma grupp magħmul minn Gianluca Ginoble, Ignazio Boschetto u Piero Barone.
Permezz tar-rebħ tal-festival ta’ Sanremo fl-2015 huma rrapreżentaw lill-Italja fil-Eurovision Song Contest fejn spiċċaw fit-tielet post.
Wara komplew b’karriera fantastika li fiha għamlu anki isem fl-Amerka Latina.
Din is-sena reġgħu ħadu sehem f’San Remo fejn spiċċaw fit-tielet post.
