Il-passaport jew dokument li eventwalment se jintuża biex juri jekk wieħed ikunx imlaqqam jew le kontra l-COVID-19, jista’ jkun għodda importanti biex ikun hemm ivvjaġġar sigur bejn il-pajjiżi, inkluż f’Malta.
Iddikjara dan il-Prim Ministru Robert Abela fuq il-programm Insights mal-ġurnalist Glen Falzon il-Ġimgħa filgħaxija, fejn fuq l-istazzjon nazzjonali, wieġeb mistoqsijiet fuq diversi temi.
Robert Abela qal li jrid li l-industrija tat-turiżmu f’pajjiżna terġa’ tqum fuq saqajha b’mod sigur.
Dan mistenni jkun dikuss fil-Kunsill Ewropew tal-ġimgħa d-dieħla li se jsir b’mod virtwali.
Qal kif, “Li naraw li l-industrija tat-turiżmu terġa’ tqum fuq saqajha imma li tagħmlu b’mod safe. Minix lest li nissogra s-saħħa tan-nies għal industrija jew oħra. Imma nemmen li nibbilanċjaw, li nibbilanċjaw li l-industrija tat-turiżmu tirpilja u tirpilja bis-saħħa, dan nagħmluh b’mod safe. Il-passaport jista’ jkun għodda importanti biex naslu għal dak il-għan.”
Dwar l-infurzar li qed isir biex tiġi kkontrollata l-imxija, Dr Abela nnota kif fix-xahar ta’ Diċembru, sinonimu mal-festi, uffiċjali mill-Awtorità Maltija għat-Turiżmu wettqu madwar tlett elef spezzjoni f’ristoranti madwar il-pajjiż.
Mistoqsi dwar il-MoneyVal, il-Prim Ministru kien ċar.
Qal li, “Il-MoneyVal kellna 58 boxes, requirements u lqatnihom kollha kemm huma.”
Għal darba, darbtejn, il-Prim Ministru appella lill-Oppożizzjoni Nazzjonalista biex tiġbed ħabel wieħed fuq il-programm rivedut taċ-ċittadinanza, li serva ta’ spalla enormi fil-pandemija.
Spjega, “Qed nitlob li jingħaqad magħna u fuq dan is-suġġett niġbdu ħabel wieħed. Ejja nħarsu lejn il-ġid kbir li seta’ jsir bit-tfaddil li kellna minn dan il-programm f’dawn l-aħħar xhur ta’ pandemija, li ma kellniex il-programm forsi ma konniex inkunu f’qagħda biżżejjed biex nagħtu s-sostenn li tajna.”
Dwar l-Air Malta, il-Prim Ministru spjega kif bħalissa għaddejja ħidma intensiva biex jitnaqqsu l-ispejjeż fuq l-operat. B’ton determinat, qal li mhux se jħalli lil din il-kumpanija tfalli.
Mistoqsi fuq il-prostituzzjoni f’pajjiżna, Dr Abela qal li minkejja li jaqbel mad-dikriminalizzazzjoni tagħha, saħaq li ma jridx li Malta tiġi pajjiż tal-briedel u tlajjar.
Il-Prim Ministru ġie mistoqsi wkoll fuq l-applikazzjoni tal-Pipeline tal-gass.
Qal, “Issa qed inħarsu lejn il-Hydrogene ukoll, jiġifieri l-Pipeline se jkun wieħed li jittrasporta l-gass imma jista’ jinqaleb għall-użu tal-idroġenu. Se nkunu qed nagħmlu argumenti robusti mal-Kummissjoni biex temmen fil-proġett tagħna.”
B’kuntrast għall-Oppożizzjoni, Robert Abela tenna l-pożizzjoni tal-Gvern Laburista biex tinbena l-mina bejn Għawdex u Malta u qal li din mhux se ssir biex nirrovinaw l-ambjent iżda biex intejbu l-kwalità tal-ħajja tal-Għawdxin.
Il-Prim Ministru ma naqasx milli juri r-rieda tiegħu biex titwaqqaf l-Awtorità tal-Bini u l-Kostruzzjoni.
Qal kif, “Rakkomandazzjoni ewlenija ta’ dak ir-rapport hija li titwaqqaf il-Building and Constuction Authority, dak l-abbozz qiegħed fil-Parlament u iġri nagħmlu d-diskussjoni u nivvutaw fuqha ħalli titwaqqaf l-Awtorità u nżidu l-istandards regolatorji.”
U ftit wara li l-Kummissarju tal-Kummissjoni għad-Drittijiet tal-Persuni b’Diżabilità, Oliver Scicluna, ġie approvat biex ikun co-opted fil-Parlament Malti, Il-Prim Ministru kellu biss kliem ta’ tifħir.
Qal li, “Qegħdin nibagħtu messaġġ b’saħħtu li rridu fl-inklużjoni, nemmnu f’persuni b’abbiltà u mhux b’diżabilità, persuni li għandhom abilitajiet. Imbagħad f’Oliver Scicluna iva jiena nara persuna li nħares lejh fuq il-kwalitajiet tiegħu ta’ bniedem li niddeskrivih bħala mexxej.”
