Ftit wara t-tokki ta’ nofsinhar tal-Ħadd, wara t-talba tal-Angelus, il-Papa Franġisku ħabbar li l-Isqof Emeritu ta’ Għawdex, Monsinjur Mario Grech se jkun kreat Kardinal.
Il-Monsinjur Grech u tnax oħra se jinħatru f’din il-kariga kruċjali waqt il-Konċistorju fit-tmienja u għoxrin ta’ Novembru li ġej.
Monsinjur Grech għandu tnejn u sittin sena u sar Isqof t’ Għawdex f’Jannar tal-elfejn u sitta, kariga li dam jokkupa sa din is-sena.
Aktar kmieni din is-sena, il-Papa Franġisku ħatar lil Monsinjur Grech bħala Segretarju Ġenerali tas-Sinodu tal-Isqfijiet, u issa bħala membru fuq il-Kummissjoni Pontifiċja għall-Promozzjoni tal-Għaqda fost l-Insara.
B’hekk, Monsinjur Grech se jkollu vot sabiex jivvota fil-konklavi.
Intant, fl-ewwel kummenti li għamel ma’ ONE News, il-Kardinal Elett Monsinjur Mario Grech qal kif huwa jinsab sorpriż u ma kienx jaf b’dan u semma’ m’għand ħbieb tiegħu.
Mons. Grech qalilna: “Sirt naf, ċempluli minn Malta u kont għaddej fit-triq u nirċievi telefonata m’għand koppja ħbieb tiegħi u qaluli li l-Papa kien għadu kif ħabbar din in-nomina.”
Monsinjur Grech qal magħna kif dan huwa impenn ieħor biex jgħix il-ħajja saċerdotali tiegħu fil-knisja b’risq il-bnedmin u biex il-komunjoni tal-knisja tkompli tissaħħaħ.
Huwa stqarr: “Inqis li dan huwa impenn ieħor biex ngħix il-vokazzjoni saċerdotali tiegħi fil-Knisja, b’risq il-bnedmin, f’għaqda aktar mal-Papa Franġisku.”
Fuq Twitter il-Prim Ministru Robert Abela feraħ lil Mario Grech u qal li qed jagħmel lill-poplu Malti u Għawdxi kburi. Xi ħaġa li qalha wkoll il-Gvern fi stqarrija, fejn zied jingħad ukoll li dan huwa unur għall-Gzejjer Maltin.
Il-President ta’ Malta George Vella u l-Kap tal-Oppożizzjoni Bernard Grech wkoll ferħu lil Monsinjur Mario Grech. Magħhom ingħaqdet ukoll l-Arċidjoċesi ta’ Malta u dik f’Għawdex.
Fi stqarrija, il-Partit Laburista wkoll feraħ lil Mario Grech għal din il-kariga, u nnota li l-Papa Franġisku sejjaħ lil Grech l-ewwel fil-lista, li tagħti dritt lill-Monsinjur Grech li dakinhar tal-Konċistorju, jindirizza lill-Qdusija Tiegħu f’isem il-porporati ġodda.
Grech huwa t-tielet Kardinal għal Malta u Għawdex wara Fabrizio Sceberras Testaferrata, li serva f’din il-kariġa bejn l-elf tmien mija u tmintax u l-elf tmien mija tlieta u erbgħin, u Prospero Grech li serva fil-kariġa ta’ Kardinal bejn l-2012 u l-2019.
Intant, l-Ispeaker tal-Kamra tad-Deputati Anġlu Farrugia wkoll feraħ lil Monsinjur Mario Grech.
F’ismu u f’isem il-membri kollha tal-Kamra, l-Ispeaker Farrugia awgura lil Monsinjur Grech ħidma sfieqa f’dan l-irwol u kariga tant prestiġjuża.
I congratulate @GrechMario for his nomination to be created as Cardinal by @Pontifex – Mons Grech has made #Malta & #Gozo so proud following this nomination being only 3rd #Maltese to be appointed Cardinal in History. – RA
— Robert Abela (@RobertAbela_MT) October 25, 2020
Aqra wkoll:
https://www.one.com.mt/2020/10/25/bil-filmat-ninsab-sorpriz-l-ewwel-kummenti-ta-mons-mario-grech-1/
