Il-ġimgħa ta’ Santa Marija, waħda mill-aktar ġimgħat impenjattivi fl-ibħra Maltin. Sbaħna proprju ma’ tar-Red Cross, sabiex insegwu l-ħidma tagħhom favur aktar sigurtà fl-ibħra tagħna.
Ta’ kuljum is-Soċjetà tas-Salib l-Aħmar, mhux biss tara li tipprevjeni kull periklu fl-ibħra Maltin, iżda wkoll tassisti f’kull emerġenza li tista’ tinqala’ fuq il-baħar.
Crew ta’ ONE News qatta’ nofstanhar magħhom iwettqu r-rondi fuq il-baħar, fejn filwaqt li konna abbord il-lanċa, huma ssejħu sabiex jassistu persuna li kienet weġġgħet idha fuq dgħajsa.
Il-membri tas-soċjetà mhux biss taw l-ewwel għajnuna, iżda staqsewha wkoll jekk hija riditx tevakwa minn fuq id-dgħajsa.
Tkellimna mad-Direttur tal-Operazzjonijiet tas-Soċjetà tas-Salib l-Aħmar, Robert Brincau, li fisser kif is-soċjetà hija estensjoni tas-servizzi tal-emerġenza f’pajjiżna, u kif ta’ kuljum tassisti għexieren ta’ persuni, anke fuq il-bajjiet permezz tal-lifeguards.
“Dan huwa estensjoni tas-servizz tal-Emerġenza. Aħna fis-Sajf, inżidu l-kapaċitajiet tagħna fuq il-kosta kollha u anke fil-baħar, però huwa servizz komplut li jingħaqad mas-servizz tal-emerġenza kollha, u huwa servizz ukoll issapportjat mija fil-mija mill-Awtorità Maltija għat-Turiżmu.”
Huwa żied jgħid kif l-għan tas-Soċjetà mhuwiex biss li ssalva lil dawk li jkunu f’riskju, iżda wkoll li tipprevjeni l-periklu – billi jiġbdu l-attenzjoni ta’ dawk li jkunu qed jiskru l-liġi, jew jipperikolaw ħajjithom, jew ħajjet oħrajn.
Qal, “Specjalment il-parti tat-Tramuntana, li taqa’ kompletament taħtna, hija busy ħafna, u jkollna ħafna inċidenti żgħar. Wieħed mill-akbar xogħlijiet tagħna huwa li nipprevjenu – jiġifieri waqt li dak li jkun għaddej u naraw xi ħaġa ħażina, jew xi ħafna riskju, inwaqqfuhom.”
Hu żied jispjega l-ħidma tas-soċjetà – b’forom differenti, li lkoll jiddependu fuq l-emerġenza li jkun hemm.
Qal, “Il-jetskis speċjalment, jagħtu sapport aktar lill-bajjiet għax huma jistgħu jidħlu aktar fil-viċin, u mbagħad għandna ħafna inġenji tal-baħar, li jkunu għaddejjin. Meta jiġri xi ħaġa, dejjem għandek iċċempel il-112, u minn hemmhekk, skont il-pożizzjonijiet tagħna, naraw min ikun jista’ jmur l-ewwel.”
Intant, waqt dawn il-jiem daqstant impenjattiva, huwa għadda l-appell tiegħu.
Qal, “Lill-għawwiema nħeġġiġhom biex kemm jista’ jkun joqogħdu fiż-żoni mmarkati għall-għawwiema. Meta joħorġu ‘l barra minn dawn iż-żoni, anke meta jkunu fuq id-dgħajjes, kemm jista’ jkun, joqogħdu fuq wara tad-dgħajsa, u ma jinqalawx ħafna ‘l barra, għax hemm ikun hemm lok għal inċidenti. Dawk li jkunu se joħorġu ‘l barra, inħeġġuhom joħorġu ballun jew kappell jidher u jieħdu pjaċir mingħajr ma jweġġgħu.”
