L-Erbgħa filgħaxija, ġurnalist ta’ dan l-istazzjon ma tħalliex jagħmel mistoqsija lill-Kap Nazzjonalista Bernard Grech, wara l-voti li ttieħdu fil-Parlament.
Dan anke jekk kien il-Partit Nazzjonalista stess li bagħat sejħa lill-midja għal barra l-Parlament. Minflok il-ġurnalisti ma tħallew jistaqsu xejn.
BERNARD GRECH: “Nirringrazzjakom u nsellmilkom.”
ĠURNALIST: “Onorevoli, Dr Grech?”
Minn hawn, il-Kap tal-Oppożizzjoni telaq ma’ bosta uffiċjali u anke bodyguards lejn il-protesta, li kienet qed tiġi organizzata mill-għaqda estremista Nazzjonalista Repubblika.
Minkejja dan, il-ġurnalist ta’ ONE News Francesco Borg kompla jipprova jistaqsi lil Grech, iżda kif jixhdu l-filmati li se nxandru juru, b’mod ċar, li dan beda jiġi ostakolat u mwaqqaf milli jagħmel xogħlu minn dawk li kienu qed jiċċirkondawh.
Kif deher fil-filmat, fost dawk li waqqfu lill-ġurnalist tagħna kien hemm l-uffiċjali tal-komunikazzjoni tal-Partit Nazzjonalista, Nathaniel Attard u Simon Cassar, ix-xufier personali ta’ Grech, uffiċjal tas-sigurtà li jkun mal-Kap Nazzjonalista u s-Segretarju Internazzjonali u kandidat Nazzjonalista Beppe Galea.
Wara ħafna tentattivi, il-ġurnalist irnexxielu jagħmel mistoqsija unika lill-Kap Nazzjonalista.
ĠURNALIST: “Dr Grech, għandi mistoqsija, jekk ma jimpurtax. Dr Grech, għandi mistoqsija, jekk ma jimpurtax. Dr Grech, għaliex Alex Borg ma vvotax magħkom illum?”
BERNARD GRECH: “Alex Borg imsiefer.”
ĠURNALIST: “Jaqbel miegħek?”
BERNARD GRECH: “Weġibtek. Alex Borg imsiefer… Issa l-importanti li tkun onest u ssemmi dak li għedtlek.”
Hawn Bernard Grech mar idur maċ-ċorma żgħira li attendiet wara li wieġbet is-sejħa tal-għaqda Repubblika u iżjed minn kollox għamlet ħoss biss bil-borom u s-sfafar, li l-parteċipanti ntalbu jieħdu magħhom f’tattika simili tal-imgħoddi, sa mis-sittinijiet.
Hawnhekk ukoll xi ħadd miċ-ċorma ddeċieda li jissotta lill-ġurnalist tagħna b’oġġett, li x’aktarx kienet suffara, kif jixhed filmat mix-xandira diretta tal-għaqda Repubblika.
Din mhux l-ewwel darba li uffiċjali tal-Partit Nazzjonalista waqqfu lill-ġurnalisti ta’ din il-kamra tal-aħbarijiet milli jagħmlu dmirhom, tant li wkoll spiċċaw jinħarġu ċanfiriet mill-Istitut tal-Ġurnalisti Maltin, l-IĠM.
F’Novembru li għadda, il-Kap tal-Komunikazzjoni tal-Partit Nazzjonalista, Nathaniel Attard, ġebbed lill-ġurnalist ta’ ONE News Nolan Camilleri waqt li wkoll ipprova jagħmel mistoqsijiet lill-Kap Nazzjonalista.
Ftit tal-ġimgħat wara, il-ġurnalist Francesco Borg, li nzerta l-istess wieħed li twaqqaf milli jistaqsi l-Erbgħa filgħaxija, ġie attakkat minn partitarju Nazzjonalista waqt li kien qed jagħmel mistoqsijiet lid-Deputat Nazzjonalista Toni Bezzina.
Dwar dan il-każ mistennija saħansitra jinbdew proċeduri fil-Qorti fiż-żmien li ġej wara li tressaq rapport fl-Għassa tal-Pulizija tal-Belt dak iż-żmien.
