Sparatura tard l-Erbgħa filgħaxija ħalliet raġel ta’ sebgħa u għorin sena mejjet u żagħżugħ ta’ sbatax-il sena ferut l-isptar.
Iż-żewġt irġiel huma kuġini ta’ xulxin.
Kien għall-ħabta tal-ħdax u kwart ta’ filgħaxija, meta fi Triq il-Konvoj ta’ Santa Marija waqfet f’nofs ta’ triq karozza li fiha kien hemm raġel b’tir f’rasu li ġie ċċertifikat mejjet fuq il-post, u żagħżugħ ferut b’żewġ tiri.
ONE News kien l-ewwel fuq il-post hekk kif bdew jaslu l-qraba fuq il-post.
Fuq il-post kien għad hemm xi nies li kienu għadhom kemm segwew spettaklu pirotekniku tal-festival internazzjonali tal-logħob tan-nar.
Mal-ħin sar magħruf li r-raġel mejjet kien Saviour Gaffarena u ż-żagħżugħ ferut kien Vince Gaffarena.
Fl-Imqabba stajna naraw preżenza qawwija ta’ pulizija u anki esperti forensiċi li priservaw ix-xena.
Intant il-Ħamis filgħodu, ONE News żvela li b’rabta ma’ din l-isparatura, ġew arrestati numru ta’ persuni.
Dan ġie kkonfermat ftit tal-ħin wara f’konferenza tal-aħbarijiet fil-Kwartieri Ġenerali tal-Pulizija fil-Furjana.
Il-kelliem għall-Korp tal-Pulizija Brandon Pisani spjega li għall-ħabta tas-sagħtejn ta’ filgħodu, ġew arrestati erba’ persuni, f’ħidma konġunta bejn il-Pulizija tad-Dipartiment tar-Reati Maġġuri, tal-Ispecial Intervention Unit, tar-Rapid Intervention Unit, tat-Traffiku u tad-Distrett.
Huwa spjega: “Ftit inqas minn tliet sigħat wara, iċċirkondaw xi residenzi fil-qasam tad-djar ta’ Ħal Kirkop u hemmhekk ġew arrestati żagħżugħ ta’ dsatax-il sena u ieħor ta’ tmintax-il sena li huma l-prime suspects. Apparti dawn iż-żewġ prime suspects, il-Pulizija qiegħda wkoll iżżomm żewġ persuni oħra, raġel ta’ sbatax-il sena u mara ta’ wieħed u għoxrin sena li qegħdin jgħinu fl-investigazzjonijiet tal-Pulizija.”
Kien spjegat kif daħlet telefonata fil-Control Room tal-Pulizija, li fil-bypass tal-Imqabba kien hemm xi persuni feruti.
Il-Pulizija u tim mediku li nzertaw kienu fuq il-post minħabba l-Festival Internazzjonali tan-Nar li kien qed isir triq ’il bogħod minn fejn waqfet il-karozza, semgħu l-ħorn tal-karozza tal-vittma jpapaq, fejn ħareġ ix-xufier u beda jgħajjat li sparawlu.
Huwa sostna: “Il-vittma – ir-raġel ta’ sebgħa u għoxrin sena, instab b’tir f’rasu waqt li ż-żagħżugħ ta’ sbatax-il sena li ttieħed Mater Dei intlaqat b’tir fuq ix-xellug ta’ sidru u ieħor f’wiċċu. Matul il-lejl, iż-żagħżugħ ġie operat u bħalissa jinsab f’qagħda stabbli.”
Il-każ oriġina fl-inħawi ta’ Ħal Millieri bejn Triq iż-Żurrieq u Triq l-Imqabba fejn instabu numru ta’ skrataċċ u evidenza oħra marbuta mal-każ. Minn hemmhekk huwa maħsub li l-ferut saq lejn l-Imqabba u waqaf fi Triq il-Konvoj ta’ Santa Marija.
Is-Sur Pisani kompla jgħid: “L-iskrataċċ li nstabu ġew elevati min-naħa tal-esperti tal-Qorti u qegħdin isiru l-analiżi bħalissa fuqhom f’dan il-mument sabiex ikun stabbilit x’tip ta’ arma tan-nar setgħet intużat f’dan ir-reat.”
Huwa mifhum li kemm il-vittma u kuġinuh, u anki s-suspettati, huma magħrufa mal-Pulizija u fl-istess ċrieki ta’ reati.
Fil-fatt, mhux l-ewwel darba li ġew investigati fil-passat dwar reati varji.
Il-mottiv għad irid jiġi stabbilit, u l-Pulizija qed tistenna li ż-żagħżugħ ta’ sbatax-il sena li jinsab l-isptar, ikun f’pożizzjoni li jiġi mitkellem mill-Pulizija.
Biswit il-kelliem għall-Korp Brandon Pisani, fil-konferenza tal-aħbarijiet kien hemm ukoll l-Assistent Kummissarju responsabbli mid-distrett Stephen Mallia, l-Assistent Kummissarju tal-Investigazzjoni Kriminali Sandro Gatt, u s-Supretendent Ramon Cassar mill-Iskwadra tar-Reati Maġġuri.
Il-Maġistrat tal-Għassa Victor Axiaq qed imexxi l-inkjesta u l-investigazzjonijiet tal-Pulizija għadhom għaddejjin.
Il-vittma huwa Saviour Gaffarena ta’ 27 sena
Aqra wkoll:
https://www.one.com.mt/2020/07/30/bil-filmat-ragel-mejjet-fl-imqabba-wara-sparatura3/
