Id-Deputat Nazzjonalista David Thake, li huwa wieħed mid-19-il Deputat li nhar it-Tlieta sfiduċjaw lil Adrian Delia, qal li l-kriżi fil-Partit Nazzjonalista hija ġlieda biex l-istess Partit jiġi salvat minn idejn nies li daħlu biss biex idaħħluh ġo ħajt.
Thake stqarr: “Hawnhekk għandna ġlieda għaddejja biex dan il-partit insalvawh minn erba’ min-nies li ħatfuh bl-iskop biss li jkissruh. Din il-ġlieda li qed nagħmlu hija waħda biex insalvaw lill-Partit Nazzjonalista minn idejn min daħal biss biex idaħħlu ġo ħajt.”
B’reazzjoni għal dak li qal il-Kap tal-Oppożizzjoni u Kap tal-Partit Nazzjonalista Adrian Delia, David Thake stqarr li dak mhux diskors ta’ persuna li jrid il-ġid għall-Partit Nazzjonalista.
Thake sostna: “Illum meta kont qed nara l-Kap jitkellem, ir-reazzjoni tiegħi kienet ‘dan mhux persuna li jixtieq isolvi l-problemi. Dan mhux persuna li irid il-ġid għall-partit tagħna’.”
Thake appella lin-Nazzjonalisti biex jingħaqdu magħhom ħalli l-Partit Nazzjonalista jinħeles mill-“mostru” li qed jipprova jaħkmu.
Huwa apppella: “Ejjew ingħaqdu magħna biex il-partit neħilsuh minn dan il-mostru li qed jipprova jaħkmu.”
Intant, il-Viċi Kap tal-Partit Nazzjonalista Robert Arrigo talab għar-riżenja tad-deputati Nazzjonalisti li vvutaw kontra Adrian Delia.
Dan għamlu waqt kummenti li ta lill-midja barra d-Dar Ċentrali l-Ħamis filgħaxija ftit mumenti qabel mal-Kap Nazzjonalista Adrian Delia indirizza konferenza stampa fejn attakka lill-fazzjoni tal-eks-Kap Simon Busuttil.
Arrigo qal: “Jekk jien ivvutajt kontra l-Kap illum, se nirreżenja jiena. Ma nistax nivvota kontrik umbagħad nibqa’.”
Arrigo stqarr li l-attakk tad-deputati Nazzjonalisti ta’ Busuttil huwa wieħed sistematiku u bil-ħsieb: “Ġieli qamet qabel maratona ġbir ta’ fondi. Kultant kellna anke nikkanċellaw maratona ġbir ta’ fondi. Timed? Iva, għandi l-impressjoni li timed.”
Intant Fuq il-midja soċjali d-Deputat Nazzjonlista Edwin Vassallo qal li r-riżenja tad-deputati li sfiduċjaw lil Adrian Delia hija inevitabbli, speċjalment jekk il-proċess li nbeda din il-ġimgħa jkompli.
