Il-Kap Nazzjonalista Bernard Grech kompla fejn ħalla l-ġimgħa li għaddiet b’rabta mal-inizjattiva tal-Gvern favur stabbiltà fil-prezzijiet tal-ikel.
Dan hekk kif f’intervista fuq l-istazzjon tal-Partit Nazzjonalista l-Ħadd filgħodu kompla jinfexx jikkritika din l-inizjattiva importanti.
Stqarr, “Jipprova jiftiehem biex dawn qed jgħidilna jżommu l-prezzijiet stabbli. Qed jgħidilna.”
Grech għamel dan propju sebat ijiem wara li dwar dan it-tielet patt soċjali fl-aħħar snin, iddeskrivih bħala t-tfarfir taż-żebgħa.
Qal, “Qed jipprova jikkumbatti l-problema tal-umdità ġod-dar. Ineħħi t-tfarfit taż-żebgħa u jerġa’ jiżbogħ fuqu. Hekk qed jagħmel il-Gvern.
Id-dikjarazzjoni ta’ Grech fuq l-inizjattiva ‘Stabbiltà fil-prezzijiet’ tingħaqad ma’ dik tad-Deputat Nazzjonalista Ivan J. Bartolo, li rewwaħ politika tad-dwejjaq kontra l-inizjattiva li ġabet stabbiltà fil-prezzijiet tal-ikel.
Qal, “L-Onorevoli Silvio Schembri qed iħabbat bieb bieb, qed jitkellem man-negozjanti li jimportaw l-ikel, għax qed jieħu inizjattiva biex jara kif se jraħħas il-ħajja. Ma tistax toħroġ hemm barra u lin-negozjant tgħidlu ara x’se tagħmel ħa traħħas il-prezzijiet. Mela waqt li kollox qed jogħla, qed ngħidulu raħħas il-prezzijiet.”
Dan anke jekk wara Bartolo ċaħad li qal dan l-istess kliem ma’ ġurnalist ta’ dan l-istazzjon.
Ġurnalist: “Onorevoli mill-ġdid staqsejtek jekk għamilt pressjoni fuq is-supermarkets u int għidt hekk ara “Ma tistax toħroġ hemm barra u lin-negozjant tgħidlu ara x’se tagħmel ħa traħħas il-prezzijiet.” Għadek iżżomm l-istess pożizzjoni.”
Ivan J. Bartolo: “Għandek żball assolut.”
Intant, il-Kap Nazzjonalista Bernard Grech sostna li r-raġunijiet wara ż-żieda fl-inflazzjoni huma skużi mill-Gvern.
Qal, “U kien iġib skużi, għax minħabba l-gwerra, għax minħabba l-Covid. Ma nafx x’ma ġabx skużi.”
Madankollu lanqas laħqu għaddew ftit minuti li ma kkontradixxiex dak li kien għadu kif qal.
Stqarr, “U mela ma jkunx hemm raġunijiet internazzjonali għalfejn jgħolew il-prezzijiet.”
